Քչերը կգտնվեն, որ չեն սիրի արևածաղկի սերմեր: Հատկապես, որ դրանք բացի համեղ լինելը, նաև օգտակար հատկություններ ունեն: Բայց պետք չէ մոռանալ, որ արևածաղիկի սերմերի չարաշահումը կարող է վնասել առողջությունը: Ամենը արևածաղկի սերմերի մասին MedMedia.am-ը պարզել է բժիշկ-ստոմատոլոգ Շուշան Հասրաթյանից:
«Արևածաղկի բոված սերմերն իրենց մեջ պարունակում են մեծ քանակությամբ կալիում, կալցիում, մագնեզիում, ֆոլաթթու, որոշ քանակությամբ նաև վիտամիններ A,B, և C»,-ասաց բժշկուհին: Սական պետք չէ անտեսել արևածաղկի վնասակար ազդեցությունները: «Արևածաղկի օգտագործումն առաջացնում է միկրոճաքեր, որոնք հետագայում բարենպաստ միջավայր են ստեղծում բերանի խոռոչի միկրոբների համար: Դրանք էլ իրենց հերթին խթանում են կարիոս խոռոչների առաջացումն ու կարեսի բարդացումը»,-ասաց բժշկուհին և շեշտեց, որ սկզբնական շրջանում էմալի վրա փոփոխությունը աննկատ է լինում և ընթանում է անսիմպտոմ:
Վերջինս նաև համոզմունք հայտնեց, որ երբեմն սովորական արևածաղկի սերմերը ատամի կորստի պատճառ են դառնում: «Մեկ այլ վտանգ ևս. եթե սերմերը ներհրվել են միջատամնային հատված, ապա կարող են առաջացնել լնդի բորբոքում։ Հետագա բարդություններից խուսափելու համար հարկավոր է հեռացնել օտար մարմինը ֆլոսի օգնությամբ»,-ասաց Շուշան Հասրաթյանն ու շարունակեց. «Լնդի տրավմայի հետևանքով կարող է առաջանալ պտկիկների հիպերտրոֆիա (գերաճ), ատրոֆիա (հետաճ) և լնդերի արյունահոսություն»: Ստոմատոլոգը միաժամանակ շեշտադրեց այն ախտանիշները, որոնք «խոսում» են լնդերի բորբոքման մասին.
1. Կարմրություն
2. Այտուց
3. Զգայության բարձրացում
4. Աարյունահոսություն
5. Տհաճ հոտ
6. Թարախային արտահոսք