ՅՈՒՆԻՍԵՖ-ը հայտնում է հետաքրքրական տեղեկատվություն, կապված, կարանտինի ընթացքում դպրոցների փակման հետ։
Կառույցը կոչ է անում դպրոցների վերաբացումը համարել առաջնահերթություն, միջոցներ ձեռնարկել դասասենյակները հնարավորինս անվտանգ դարձնելու և պետական մակարդակով դպրոցների փակումից խուսափելու համար:
Կորոնավիրուսով պայմանավորված դպրոցների փակման հետևանքով տուժած դպրոցականների թիվը հասնում է 90 միլիոնի։
«Փաստերը ցույց են տալիս, որ այս համավարակի տարածման հիմնական շարժիչները դպրոցները չեն: Այնուամենայնիվ, կառավարությունները կրկին փակում են դպրոցները՝ որպես կանխարգելման առաջնային, այլ ոչ թե վերջին միջոց: Որոշ դեպքերում դա արվում է պետության մասշտաբով, այլ ոչ թե համայնքի, և երեխաները շարունակում են կրել փակ դպրոցների կործանարար ազդեցությունն ուսման, մտավոր և ֆիզիկական բարեկեցության և անվտանգության վրա»,-ասել է ՅՈՒՆԻՍԵՖ-ի կրթության բաժնի ղեկավար Ռոբերտ Ջենքինսը։
Դպրոցները փակվելու հետևանքով ամենաշատը տուժում են խոցելի երեխաները, որոնք կարող են ընդմիշտ դուրս մնալ ուսման համակարգից։
191 երկրից տվյալների ուսումնասիրությունը ցույց է տվել, որ դպրոցների բաց կամ փակ լինելը կապ չունի վարակակիրների թվի աճի հետ: