Ճակնդեղը բավական տարածված մթերք է, որը կիրառվում է տարատեսակ ուտեստների պատրաստման համար։ Այս արմատապտուղը լայն կիրառություն ունի և շատ հասանելի է, սակայն քչերին է հայտնի, որ այն նաև անչափ օգտակար է և օգնում է պայքարել առողջական ամենատարբեր խնդիրների դեմ։
Մասնագետների խոսքով՝ այս հասարակ մթերքն օժտված է հզոր բուժիչ հատկություններով, ինչը պայմանավորված է դրա բաղադրությամբ։ Այն պարունակում է մի շարք սննդարար նյութեր ու օրգանական բուսական միացություններ, որոնք օգնում են պահպանել առողջությունն ու պաշտպանում են տարատեսակ հիվանդություններից։ Ճակնդեղն անչափ օգտակար մթերք է, ուստի մասնագետները հորդորում են այն անպայման ներառել սննդակարգում։
Ձեր ուշադրությանն ենք ներկայացնում այս մթերքի ամենակարևոր հատկություններն ու չորս պատճառ այն սննդակարգի մասը դարձնելու համար։
Հետազոտությունները ցույց են տվել, որ ճակնդեղի հյութը բարելավում է օրգանիզմի այն մեխանիզմները, որոնք պատասխանատու են արյան ճնշման կարգավորման համար։ Նման ազդեցությունը պայմանավորված է դրանում պարունակվող օրգանական նիտրատների մեծ քանակությամբ, որոնք աղիներում հայտնվելուց հետո վերածվում են ազոտի օքսիդի։ Այս նյութի շնորհիվ էլ արյունատար անոթները թուլանում են, իսկ արյան շրջանառությունը՝ բարելավվում։
Պայքարում է բորբոքումների դեմ
Ճակնդեղը պարունակում է բուսական քիմիական նյութեր՝ բետալաիններ, որոնք գործում են որպես հզոր հակաօքսիդանտներ՝ պայքարելով բորբոքումներ առաջացնող ու բջիջները վնասող ազատ ռադիկալների դեմ։ Ավելին՝ ազոտի օքսիդը նույնպես օգնում է պայքարել բորբոքումների դեմ։
Ճնշում է քաղցկեղի բջիջների ակտիվությունը
Ճակնդեղի մեջ պարունակվող բետալաինները պայքարում են ոչ միայն բորբոքումների դեմ, այլև օգնում են ճնշել քաղցկեղի չարորակ բջիջների տարածումը։
Նվազեցնում է արյան մեջ խոլեստերինի ու շաքարի մակարդակները
Այս մթերքը հարուստ է սննդային մանրաթելերով, որոնք խոչընդոտում են աղիներում մեծ քանակությամբ խոլեստերինի կլանման գործընթացինն ու կանխում են մեծ քանակությամբ շաքարի վերամշակումը։ Միևնույն ժամանակ ճակնդեղի գործածությունը խթանում է բջիջներն ու բարելավում է դրանց արձագանքն ինսուլինին, ինչը նույնպես պաշտպանում է երկրորդ տիպի շաքարային դիաբետից։
Նյութի աղբյուրը՝ Food News