Շատ քայլել
Շուրջ 400 հետազոտության վերլուծությունը ցույց է տվել, որ ֆիզիկական ակտիվությունը, այդ թվում պարզապես արագ քայլելը, նույնքան արդյունավետ է զարկերակային ճնշման նվազեցման հարցում, որքան դեղորայքը։ Սա է պատճառը, որ զարկերակային բարձր ճնշման կարգավորման համար մասնագետները խորհուրդ են տալիս օրական առնվազն կես ժամ քայլել։
Խորը շնչել
Զարկերակային ճնշման նվազեցման համար մասնագետները խորհուրդ են տալիս օրական երկու անգամ մի քանի րոպե տրամադրել շնչառական վարժություններին։ Պարզապես հարկավոր է մի քանի րոպե հանգիստ նստել և դանդաղ ու խորը շնչել։ Սա կօգնի վերահսկել սթրեսի հորմոնների մակարդակն առանց դեղորայքի, իսկ այս հորմոնները բարձրացնում են սրտի կծկումների հաճախականությունն ու նեղացնում են արյունատար անոթները՝ նպաստելով զարկերակային ճնշման բարձրացմանը։
Օգտագործել կալիումով հարուստ մթերք
Այս հանքանյութն ստիպում է երիկամներին դուրս բերել նատրիումն օրգանիզմից մեզի միջոցով, ինչն էլ օգնում է նվազեցնել զարկերակային ճնշումն առանց դեղորայքի։ Կալիումի լավագույն աղբյուրներն են բանանը, կարտոֆիլը, լոլիկը, նարնջի հյութը, լոբին, ոլոռը, սեխը, սալորաչիրն ու չամիչը, ուստի զարկերակային բարձր ճնշման դեպքում խորհուրդ է տրվում ներառել դրանք սննդակարգում։
Նվազեցնել նատրիումի գործածությունը
Զարկերակային բարձր ճնշման դեպքում Սրտաբանների ամերիկյան ընկերակցության մասնագետները խորհուրդ են տալիս առաջին հերթին նվազեցնել նատրիումի գործածությունն ու չգերազանցել օրական 1500 մգ-ը։
Օգտագործել մուգ շոկոլադ
Եվս մի փորձված միջոց է մուգ շոկոլադի գործածությունը։ Հարավային Կալիֆոռնիայի համալսարանի գիտնականների հետազոտությունները ցույց են տվել, որ պարբերաբար մուգ շոկոլադի գործածությունը կօգնի նվազեցնել զարկերակային սիստոլիկ ճնշումը միջինում հինգ միավորով, իսկ դիաստոլիկը՝ միջինում երեք միավորով։ Նման ազդեցությունը բացատրվում է շոկոլադում ֆլավոնոլների պարունակությամբ, որոնք թուլացնում են արյունատար անոթները։
Կարկադե խմել
Թաֆթսի համալսարանի գիտնականները պարզել են, որ օրական երեք բաժակ կարկադե թեյ խմելն օգնում է չափավոր բարձր զարկերակային ճնշում ունեցող հասուն մարդկանց ընդամենը վեց շաբաթում նվազեցնել զարկերակային ճնշումը յոթ միավորով։ Նման դրական ազդեցությունը մասնագետները կապում են այն քիմիական տարրերի հետ, որոնք պարունակվում են թեյի պատրաստման համար կիրառվող հիբիսկուսի ծաղիկների մեջ։
Մի բաժակ կաթ խմել
Գիտնականները պնդում են, որ որոշ դեպքերում զարկերակային ճնշումը պայմանավորված է լինում բորբոքումներով, որոնք առաջանում են սննդակարգում մեծ քանակությամբ ռաֆինացված ածխաջրերի գործածության հետևանքով։ Այս արագ ածխաջրերը մասամբ կաթնային սպիտակուցներով փոխարինելը կօգնի նվազեցնել սիստոլիկ ճնշումը զարկերակային գերճնշման զարգացման վաղ փուլերում։
Նյութի աղբյուրը՝ medikforum.ru
