Առողջապահության նախարար Անահիտ Ավանեսյանն այսօր ՄԱԿ-ի Բնակչության հիմնադրամի հայաստանյան գրասենյակի ղեկավարների և բժիշկ-փորձագետների հետ քննարկել է 2021 թվականին հիմնադրամի կողմից ՀՀ-ում իրականացված անպտղության տարածվածության վերաբերյալ հետազոտության արդյունքները:
Անդրադարձ է եղել որոշ խմբերում անպտղության ցուցանիշների փոփոխություններին և դրանց նպաստող գործոններին:
Հնչել են առաջարկներ բնակչության իրազեկման, հակաբեղմնավորիչ միջոցների մասին տեղեկատվության և դրանց հասանելիության մակարդակի բարձրացման, որոշ մանկաբարձական վիրահատությունների ցուցանիշների նվազեցման, արական գործոնով պայմանավորված անպտղության դեպքերի պատճառների վերհանման ուղղությամբ:
Առողջապահության նախարարը կարևորել է, որ աշխատանքները կրեն շարունակական բնույթ, իսկ արդյունքների վերլուծությունից հետո լինեն գործնական առաջարկներ:
Հետազոտության արդյունքները կներկայացվեն առաջիկայում՝ առողջապահության նախարարին կից մանկաբարձության և գինեկոլոգիայի խորհրդի նիստին: