Գրիպի վիրուսը մշտապես մուտացիայի է ենթարկվում, եւ այդ պատճառով ամեն տարի մասնագետները ստիպված են նոր պատվաստանյութեր մշակել։ Սակայն գիտնականները գրիպի դեմ միասնական պատվաստանյութ ստեղծելու միջոց են գտել։Հետազոտությունը հրապարակվել է Nature հեղինակավոր ամսագրում։
Ըստ Medportal.ru-ի՝ պատվաստանյութերը կարծես «սովորեցնում են» մեր օրգանիզմին արձագանքել հակագեններին: Քանի որ գրիպի վիրուսը մշտապես մուտացիայի է ենթարկվում, գիտնականները պետք է մշտապես թարմացնեն պատվաստանյութերը, որպեսզի մարմինը կարողանա նոր հակամարմիններ արտադրել, քանի որ յուրաքանչյուրը համապատասխանում է իր սեփական հակագենին:
Միացյալ Նահանգներից մի խումբ գիտնականներ ուշադրություն են հրավիրել վիրուսի մի հատվածի վրա, որն ունեն գրիպի մեծ թվով շտամներ, եւ դրա նկատմամբ կարող են հակամարմիններ արտադրվել:
«Մարդու իմունային համակարգն արդեն կարող է հակամարմիններ արտադրել այդ հակագենի նկատմամբ, ուստի մնում է միայն կիրառել ժամանակակից սպիտակուցային ինժեներիա՝ ստեղծելու պատվաստանյութ, որը կարող է առաջացնել այդ հակամարմինները բավարար քանակությամբ»,-ասել է հետազոտության հեղինակներից մեկը՝ Ջեննա Գաթմիլլերը Չիկագոյի համալսարանից։
Գիտնականներն այս հակամարմինները անվանել են խարիսխ, քանի որ դրանք արձագանքում են վիրուսի արմատային, գրեթե անփոփոխ ֆրագմենտին։