Չինաստանի մոլեկուլային կենսաբանության ոլորտի մասնագետները հայտնաբերել են 35B5 հակամարմինը, որը կարող է կապվել կորոնավիրուսի S-սպիտակուցի կառուցվածքի ամենակայուն հատվածի հետ և չեզոքացնել նրա բոլոր շտամները, այդ թվում՝ նորահայտ Օմիկրոնը։ Այս մասին ասվում է bioRxiv էլեկտրոնային գրադարանում նոյեմբերի 30-ին հրապարակված հոդվածում։
«Մեր ստացած պատկերները ցույց են տվել, որ 35B5 մոլեկուլը կապվում է կորոնավիրուսի S-սպիտակուցի այն մասի հետ, որն իրականում չի փոխվում SARS-CoV-2-ի էվոլյուցիայի ընթացքում։ Սա հնարավորություն է տալիս օգտագործելու սպիտակուցային տվյալ հատվածը ոչ միայն հակամարմիններ ստեղծելու, այլև՝ կորոնավիրուսի բոլոր շտամների դեմ ունիվերսալ պատվաստանյութ մշակելու համար»,- գրել են գիտնականները։
Նշվում է, որ չինացի բժիշկները Գուանչժոուի Սուն Յացեն համալսարանի պրոֆեսոր Դենգ Քայի գլխավորությամբ եզակի հակամարմինը հայտնաբերել են կորոնավիրուս տարած տեղացիներից մեկի արյան նմուշում։