Արդարադատության եվրահանձնակատար Դիդյե Ռեյնդերսը եվրոպական երկրներին կոչ է արել ՊՇՌ թեստի արդյունքների կամ կորոնավիրուսի դեմ պատվաստումների վերաբերյալ տեղեկատվությամբ ազգային սերտիֆիկատներ ներդնել` չսպասելով համաեվրոպական փաստաթղթի հաստատմանը: Այս մասին նա հայտարարել է երեքշաբթի Եվրախորհրդարանի լիագումար նիստին այս թեմայի շուրջ բանավեճի ժամանակ, հայտնում է ՏԱՍՍ-ը:
«Ընթացակարգն արագացնելու համար այժմ անհրաժեշտ է բոլոր երկրներում հնարավորինս շատ վկայականներ տրամադրել, որպեսզի մինչ հուլիսի 1-ը դա մեզ համար անակնկալ չդառնա, եւ մենք պատրաստ լինենք պարզեցնել ազատ տեղաշարժման կարգը Եվրոպայում` պահպանելով որոշակի սահմանափակումներ»,- ասել է Ռեյնդերսը:
Նա նշել է, որ ԵՀ-ն արդեն գործարկել է սանիտարական սերտիֆիկատների իսկությունը ստուգելու ինտերնետային պորտալը եւ հիշեցրել է, որ ԵՄ յոթ պետություններ արդեն սկսել են նման փաստաթղթերի տրամադրումը: «Մայիսի 10-ից 26 անդամ երկրներ փորձարկել են տրամադրմանը միանալու իրենց կարողությունը, եւ այսօր եւս տաս երկիր պատրաստ է սկսել այդ գործընթացը»,- ասել է Եվրահանձնակատարը:
Ռեյնդերսը շեշտել է, որ կանաչ թվային սերտիֆիկատը չպետք է պատրվակ լինի ճանապարհորդել ցանկացողների նկատմամբ խտրականության համար, ովքեր տարբեր պատճառներով չեն կարող պատվաստվել: «Մենք պետք է ապահովենք տեղաշարժի ազատության իրավունքի պահպանումը եւ երաշխավորվենք մուտքի իրավունքը ՊՇՌ թեստի կամ հակամարմինների թեստերի արդյունքների հիման վրա: Հուսով եմ, որ առաջիկա շաբաթների ընթացքում հնարավոր կլինի առաջընթաց գրանցել այս թեստերի գների հարցում, որպեսզի դրանք հասանելի դառնան բոլոր անդամ երկրների բոլոր բնակիչների համար»,- ասել է նա` հավելելով, որ ԸՕ-ն արդեն որոշել է 100 միլիոն եվրո հատկացնել ԵՄ միջոցներից` այս նախաձեռնությանն օժանդակելու համար:
Աղբյուրը՝ News.am