Չումակովի անվան կենտրոնի «ԿովիՎակ» կորոնավիրուսի դեմ պատվաստանյութի առավելագույն գինը կկազմի 4 330 ռուբլի՝ ներառյալ լոգիստիկ ծախսերը: Այս որոշումը, Առողջապահության նախարարության և դեղամիջոցի մշակողի նամակներն ուսումնասիրելուց հետո կայացրել է Ռուսաստանի Դաշնային հակամենաշնորհային ծառայությունը, հաղորդում է РИА Новости-ն:
Այսպիսով, երրորդ ռուսական պատվաստանյութը անցնում է քաղաքացիական շրջանառություն և առաջիկա օրերին կհայտնվի շրջաններում:
Չումակովի կենտրոնում կամավորների մոտ հակամարմինների մակարդակը լավ է գնահատվում, և նախատեսվում է աշնանը փաստաթղթեր ներկայացնել ԱՀԿ՝ նախաորակավորման համար:
«ԿովիՎակը» հիմնված է SARS-CoV-2 վիրուսի վրա, որը հատուկ մշակվել է այնպես, որ կորցնի իր վարակիչ հատկությունները, բայց միևնույն ժամանակ պահպանի իմունային պատասխան առաջացնելու ունակությունը:
Պատվաստանյութի գրանցումը տեղի է ունեցել փետրվարին, և մինչև տարեվերջ նախատեսվում է արտադրել առնվազն տասը միլիոն դեղաչափ:
