Իսրայելի միլիոներորդ բնակիչը կորոնավիրուսի դեմ պատվաստանյութ է ստացել Հայֆայի շրջանի արաբական Ումմ ալ-Ֆահմ քաղաքի պատվաստման կենտրոնում, այս մասին հայտնում է «ՌԻԱ Նովոստին»:
«Երբ հասնի կրիտիկական զանգվածին, մի քանի միլիոն մարդ պատվաստված կլինի, հնարավոր կլինի բացել առեւտուրը, խանութները, ռեստորանները, ինչ ասես: Կարելի կլինի մեկնել արտերկիր, զբաղվել բիզնեսով եւ մեկնել Դուբայ, Աբու Դաբի, Բահրեյն»,- ասել է վարչապետ Բենիամին Նեթանյահուն, ով ներկա է եղել պատվաստմանը:
Միլիոներորդ պատվաստումը կատարվել է Մուհամմեդ Ջաբարինին:
«Ես ինձ լավ եմ զգում»,- ասել է նա պրոցեդուրայից հետո:
Հիշեցնենք, որ դեկտեմբերի 20-ին Իսրայելում սկսվել է բնակչության զանգվածային պատվաստումը COVID-19-ի դեմ: Առաջին փուլում Pfizer-ի պատվաստանյութը ստացել են առողջապահական աշխատողները, ծերանոցների աշխատակիցները եւ պետական պաշտոնյաները, ովքեր պարտավորվել են իրենց օրինակով դրդել քաղաքացիներին պատվաստվել: Երկրորդ փուլում պատվաստվել են 60-ից բարձր տարիքի քաղաքացիներ եւ ռիսկային խմբերի ներկայացուցիչներ:
