ԱՄՆ-ի Առողջության ազգային ինստիտուտները (NIH) սկսել են նոր տիպի թոքաբորբի դեմ պատվաստանյութի ստեղծման աշխատանքը, որի բռնկումն անցյալ տարվա վերջին արձանագրվել է Չինաստանի Ուհան քաղաքում, ինչից հետո դրա տարածումը շարունակվել է: Այդ մասին հայտնել է Հունվարի 21-ին CNN հեռուստաալիքը։
«NIH-ը ձեռնարկում է պատվաստանյութի մշակման առաջին քայլերը»,- մեջբերում է հեռուստաալիքն Ազգային ինստիտուտների ալերգիայի եւ վարակիչ հիվանդությունների բաժանմունքի ղեկավար Էնթոնի Ֆոցիի խոսքը: Ըստ Էնթոնի Ֆոցիի՝ մշակվող պատվաստանյութի կլինիկական հետազոտությունները կարող են տեւել մի քանի ամիս, եւ միայն մեկ տարի անց այն կկարողանան կիրառել պրակտիկայում:
Իր հերթին Հյուսթոնի (Տեխասի նահանգ) Բեյլոր բժշկական քոլեջի պատվաստանյութերի մասնագետ Փիտեր Հոտեսը պատմել է, որ պատրաստուկի մշակմամբ զբաղված է նաեւ մի խումբ գիտնականներ Տեխասից, Նյու Յորքից եւ Չինաստանից։ Այս մասին հաղորդել է ՏԱՍՍ-ը: