Առողջապահության նախարարությունը ֆինանսական անարդար քաղաքականություն է վարում մարզային բուժկենտրոնների նկատմամբ և գումարները կենտրոնացում է Երևանում: Բնականաբար, այդ բուժկենտրոնները, որոնք ունեն թերի ֆինանսավորում, չեն կարողանա նորմալ գոյատևել, արդիական սարքավորումներ ներկրել և աշխատավարձ տալ իրենց աշխատակիցներին:
Այս մասին 168.am-ի հետ զրույցում ասաց բժիշկ ուրոլոգ, առողջապահության կազմակերպիչ Գևորգ Գրիգորյանը:
Նրա խոսքով՝ նման քաղաքականության հետևանքով բուժկենտրոնները կգնան փակման, քանի որ նրանց համար առաջնային կարևորություն է ֆինանսավորումը, իսկ եթե դա պետությանը ենթակա բուժկենտրոն է, ապա պետական ֆինանսավորումը:
«Նման ճակատագրի արժանացել է նաև Մարալիկի ծննդատունը. որոշում է կայացվել այլևս չֆինանսավորել ծննդատունը, որի հետևանքով էլ այն փակվում է: Փակման պատճառներից են նաև բժշկատնտեսագիտական չափորոշիչների կամ չլինելը, կամ էլ անարդար կերպով գործելը»,- պատճառաբանում է նա:
Ըստ Գևորգ Գրիգորյանի՝ մարզային բուժկենտրոնների առանձնահատկությունները հաշվի չեն առնվում: Ինչն ակնհայտ է նաև Մարալիկի ծննդատան դեպքում: Եթե նախարարությունը ծննդատան փակումը պատճառաբանում է քիչ ծնունդ ունենալով, հաշվի չի առնում, որ Մարալիկի համար 106 ծնունդը մեծ թիվ է: