Վրաստանի առողջապահության նախարար Եկատերինա Տիկարաձեն կոչ է արել երկրի քաղաքացիներին Բաթումից վերադառնալուն պես մեկուսանալ և առաջին իսկ ախտանշանների դեպքում զանգահարել թեժ գիծ։
Ըստ նրա՝ դա շատ կարևոր է, որպեսզի կառավարությունը ստիպված չլինի դիմել ավելի խիստ միջոցների և վերականգնել կարանտինի ռեժիմը:
«Ես ուզում եմ մեր բնակչությանը խնդրել պահպանել սոցիալական հեռավորությունը, նույն պատասխանատվությամբ կրել դիմակներ, ինչպես ամբողջ տարվա ընթացքում` օգնելու կոտրել վիրուսային շղթան», – լրագրողներին ասել է Տիկարաձեն:
Նախարարը հայտարարությունն արել է սեպտեմբերի 2-ին, երբ Վրաստանը կորոնավիրուսային վարակի ռեկորդային թվով՝ 38 դեպք էր գրանցել։ Նման բարձր ցուցանիշ վերջին անգամ գրանցվել էր ապրիլի 17-ին`34 դեպք:
Վարակման դեպքերի մեծ մասը գրանցվել է Բաթումում։ Այնտեղ անվտանգության միջոցառումները կուժեղացվեն, բայց քաղաքը չեն փակի: