Գերմանիայում և Էստոնիայում կորոնավիրուսի համավարակի երկրորդ ալիքն է սկսվել, որի մասին նախկինում զգուշացնում էին փորձագետները:
korrespondent.net-ի փոխանցմամբ՝ Marburger Bund գերմանացի բժիշկների միավորման նախագահ Սյուզանե Յոնայի խոսքով՝ երկրորդ ալիքը մարտ-ապրիլին մեկնարկած առաջին ալիքի համեմատությամբ ավելի թույլ է, սակայն միևնույն է՝ նոր վարակակիրների թիվը հետևողականորեն ավելանում է։
«Դրա հետ մեկտեղ՝ վտանգն է մեծանում, որ մինչ այժմ Գերմանիայում ձեռք բերված հաջողությունները բաց կթողնենք»,- զգուշացրել է փորձագետը։
Յոնան հավաստիացրել է, որ գերմանական կլինիկաները պատրաստ են կորոնավիրուսի երկրորդ ալիքին, քանի որ այն աստիճանաբար է զարգանում։
Էստոնիայի կառավարությունն էլ, gazeta.ru-ի փոխանցմամբ, վարակակիրների թվի ավելացման ֆոնին, օգոստոսի 6-ին ցանկանում է խստացնել կորոնավիրուսի դեմ պայքարի միջոցառումները։ Մինչ այս, երկրի վարչապետ Յուրի Ռաթասը հայտարարել է, որ վարակման մակարդակը հասել է 2,6-ի՝ չնայած որ մեկ ամիս առաջ ցուցանիշը հավասարվել էր 1,0-ի։
Էստոնիայում հայտնաբերվել է կորոնավիրուսով վարակման 2091 դեպք, մահացել է 63, առողջացել՝ 1937 մարդ։
