Մարտունու բժշկական կենտրոնում հուլիսի 24-ին տեղի կունենա բժշկական սարքավորումների նվիրատվություն՝ ի նպաստ COVID—19-ի համավարակի դեմ պայքարի արդյունավետության բարձրացման: «Արմենպրես»-ին այս մասին հայտնեցին «Իմ քայլը» հիմնադրամից։
«ԻՄ ՔԱՅԼԸ հիմնադրամի ջանքերով և Հիմնադրամի նվիրատուներից ռուսաստանաբնակ հայ գործարար, բարերար, արմատներով Վարդենիկ գյուղից Արթուր Այվազյանի միջոցներով Գեղարքունիքի մարզի բժշկական երկու կենտրոններ կհարստանան COVID—19-ի համավարակի դեմ պայքարում խիստ անհրաժեշտ սարքավորումներով և բժշկական նշանակության այլ միջոցներով:
Մարտունու բժշկական կենտրոնին կտրամադրվի մեկ հատ ախտահանող թունել, չորս հատ վրանների համար նախատեսված ախտահանիչ սարք, 20-ական օրինակից բժշկական բազմակի օգտագործման արտահագուստներ և դիմավահաններ անձնակազմի համար, ինչպես նաև ձեռնոցներ, բժշկական սավաններ:
Նույն փաթեթից՝ այլ խմբաքանակով տրվելու է նաև Վարդենիկի առողջության կենտրոնին»,- ասված է հաղորդագրության մեջ:
Աղբյուրը՝ armenpress.am
