Միզաքարային հիվանդություն. խնդիր որը յուրաքանչյուրիս է սպառնում: Եվ ինչպես ասում են որքան տեղեկացված են, նույնքան էլ զինված: Սա հաշվի առնելով Medmedia.am-ը Շենգավիթ ԲԿ-ի Ուրոլոգիական կլինիկայի ուրոլոգ-վիրաբույժ, անդրոլոգ Գագիկ Թադևոսյանի հետ զրուցել է միզաքարային հիվանդության (ՄՔՀ) ախտանիշների, բուժման ու կանխարգելման մասին:
«Հիվանդության առաջացումը բազմաթիվ պատճառներ ունի: Նյութափոխանակման խանգարումներով ուղեկցվող պրոցեսները, հարվահանաձև գեղձի խնդիրները, կալցիումի փոխանակության խանգարումներով ուղեկցվող հիվանդությունները կարող են հանգեցնել միզաքարային հիվանդության»,-ասաց ուրոլոգն ու հավելեց,- «Սակայն, ցավոք, այսօր մենք բախվում հիմնականում այն դեպքերին, երբ ստիպված ենք պայքարել ոչ թե պատՃառի դեմ, երբ հնարավոր է կանխել հիվանդությունը, կամ բուժել այն վաղ փուլում, այլ արդեն հեռացնում ենք առաջացած քարերը, բուժում ենք բորբոքային պրոցեսները»:
Խոսելով խնդրի վերացման մասին, Գագիկ Թադևոսյանը նկատեց, որ ժամանկակից բժշկությունը քիչ ինվազիվ մեթոդներ է առաջարկում քարերը հեռացնելու համար: «Նույնիսկ 1սմ չհասնող փոքր քարերը հանգեցնում են ուրոդինամիկայի խանգարմանը, և այսօր գերժամանակակից տեխնիկայի շնորհիվ այդ քարերը հնարավոր է դարձել հեռացնել առանց կտրվածքների: Մասնավորապես հեռահար հարվածալիքային քարափշրումն այսօր համարվում է ամենաարդյունավետ միջամտությունը»,-ասաց զրուցակիցս և ընդգծեց, որ այդ տեսակ միջամտությունից անմիջապես հետո հիվանդը կարող է տուն գնալ:
Բայց ինչպես բժշկական ցանկացած միջամտություն, սա ևս ունի հակացուցումներ, որոնցից հիմնականը, բժշկի խոսքով, քարերի մեծ չափսերն են: «Մինչև 2 սմ քարերի դեպքում ցուցված է հեռահար հարվածալիքային քարափշրում: Անշուշտ, լրացուցիչ հետազոտություններ են անհրաժեշտ, որպեսզի պարզ լինի, արդյո՞ք 2 սմ քարը փշրվելուց հետո դուրս կգա»,-նշեց ուրոլոգը:
Հարկ է նշել, որ այս մեթոդն ընտրելիս հարկավոր է հաշվի առնել օրգանիզմի համակարգային խնդիրները, օրինակ կոագուլոպաթիաները, որոնք հանգեցնում են մակարդելիության շեղման, իսկ տարեցների մոտ պետք է հաշվի առնել օրգան համակարգերի աշխատանքը:
