Չնայած նրան, որ կորոնավիրուսը կարծես նահանջում է, այդուհանդերձ, չեն դադարում խոսակցություններն առ այն, որ դեռ վաղ է հրաժեշտ տալ այս համաճարակին։ Պատվաստումային գործընթացն ինչպես ամբողջ աշխարհում, այնպես էլ Հայաստանում շարունակվում է։
Մեր երկրում կատավել է 2 257 560 պատվաստում։ Խթանիչ դեղաչափով պատվաստվել է շուրջ 76 730 հոգի։
«Բավականին ժամանակ է անցել վերջին դեղաչափից հետո, և օրգանիզմն արդեն պատրաստ չէ դիմակայել հաջորդ վիրուսի գրոհին»,- մեզ հետ զրույցում նշել էր Առողջապահության նախարարության Հիվանդությունների վերահսկման և կանխարգելման ազգային կենտրոն (ՀՎԿԱԿ) տնօրենի տեղակալ Գայանե Սահակյանը։ Նա նաև նշել էր, որ բուստեր դեղաչափը բավականին կարևոր է օրգանիզմի իմունիտետի համար։
Իսկ ինչ իրավիճակ է աշխարհում։
Նիդեռլանդներում չափահաս բնակչության կեսը հրաժարվել է վերապատվաստումից։ Այս մասին հայտնում է Lenta.ru-ն։
Միացյալ Նահանգներում պատվաստված բնակչության միայն 48 տոկոսն է դիմել առաջին խթանիչ դոզան ստանալու համար, թեև օմիկրոնի դեմ երկրորդ վերապատվաստումն արդեն իրականացվում է: Աֆրիկայում իրավիճակը դեռ անմխիթար է. մայրցամաքի մի շարք երկրներում առաջնային պատվաստում է ստացել բնակչության 20 տոկոսից պակասը (իսկ, օրինակ, Կոնգոյի Դեմոկրատական Հանրապետությունում՝ ընդամենը 3 տոկոսը)։ Միաժամանակ, ամերիկացի հետազոտողները եկել են այն եզրակացության, որ վերապատվաստումից ընդամենը հինգ ամիս անց դեղամիջոցի արդյունավետությունը կազմում է ընդամենը 19 տոկոս։
ԱՀԿ ղեկավարը կոչ է արել, որպեսզի պաշտոնյաներն ու բժիշկները մշակեն պատվաստումների գրագետ գրաֆիկ և ճանապարհ գտնեն դրանում բնակչությանը ներգրավելու համար՝ ի նմանություն գրիպի տարեկան պատվաստմանը։
Գիտնականների համար կարևոր է նաև հասկանալ, թե որտեղից է հայտնվել կորոնավիրուսը։ Սկզբում գիտնականների շրջանում գերակշռում էր այն տեսակետը, ըստ որի՝ համաճարակն առաջացել է միջտեսակային անցման արդյունքում, այսինքն՝ կենդանուց մարդուն փոխանցման արդյունքում, սակայն վերջին ամիսներին ավելի ու ավելի շատ փորձագետներ հակված են կարծելու, որ վիրուսը. կարող էր «փախչել փորձանոթից». Ուհանում, որտեղ հիվանդությունների բռնկում է գրանցվել, կա մեծ լաբորատորիա, որտեղ ուսումնասիրվել են վտանգավոր պաթոգենները, այդ թվում՝ կորոնավիրուսների ընտանիքից։ Սեպտեմբերին հեղինակավոր The Lancet բժշկական ամսագիրը հրապարակեց զեկույց, որում ենթադրվում էր, որ արտահոսքը կարող էր լինել ամերիկյան լաբորատորիաներից:
Բացի այդ, պաշտոնյաներն ու համաճարակաբանները պետք է լուրջ աշխատանք տանեն սխալների վրա, որպեսզի ավելի լավ պատրաստվեն նոր համաճարակին. մի շարք փորձագետների կարծիքով, մարդկությունը կարող է բախվել դրան շատ ավելի վաղ, քան մենք կցանկանայինք։ Տասը վարակիչ հիվանդություններից վեցը, որոնք ազդում են մարդկանց վրա, ի սկզբանե կենդանական ծագում ունեն։ Գիտնականների կարծիքով՝ գլոբալ տաքացումը կարող է հանգեցնել կենդանիների շրջանում հազարավոր նոր վիրուսների տարածմանը, և առաջիկա 50 տարում դրանցից մեկը կարող է փոխանցվել կենդանուց մարդուն և արագորեն տարածվել ամբողջ աշխարհում։ Այսպիսով, հնարավոր է, որ մենք կարճ ժամանակով հրաժեշտ տանք դիմակին և արգելափակմանը:
Ս․ Ա․
