Ուրբաթ օրը Moderna ընկերությունը հայտարարել է, որ դատի է տալիս պատվաստանյութ արտադրող մրցակից Pfizer եւ BioNTech ընկերություններին՝ պնդելով, որ նրանք խախտել են Moderna-ի արտոնագրերը՝ COVID-19-ի դեմ պատվաստանյութ մշակելիս, հայտնում է Medical Xpress-ը:
Հայցերը ներկայացվել են ինչպես ԱՄՆ Մասաչուսեթսի շրջանային, այնպես էլ Գերմանիայի Դյուսելդորֆի շրջանային դատարան։
«Moderna-ն կարծում է, որ Pfizer-ի եւ BioNTech-ի COVID-19 պատվաստանյութը խախտում է Moderna-ի կողմից 2010-ից 2016 թվականներին ներկայացված արտոնագրերը, որոնք վերաբերում են Moderna-ի հիմնական mRNA տեխնոլոգիայինն», — ասվում է ընկերության տարածած հայտարարության մեջ:
Հայտարարության մեջ ասվում է, այս հեղափոխական տեխնոլոգիան կարեւոր նշանակություն է ունեցել Moderna-ի կողմից արտադրված COVID-19 mRNA պատվաստանյութի՝ Spikevax-ի ստեղծման համար: Pfizer-ը եւ BioNTech-ը պատճենել են այս տեխնոլոգիան՝ առանց Moderna-ի թույլտվության եւ ստեղծել պատվաստանյութ:
Moderna եւ Pfizer-BioNTech ընկերություննրի կողմից արտադրված պատվաստանյութերում օգտագործվող mRNA տեխնոլոգիան տարբերվում է ավանդական պատվաստանյութի տեխնոլոգիայից, որը հիմնված է վարակի թուլացած կամ մեռած ձևերի ներարկման վրա՝ իմունային համակարգին թույլ տալով ճանաչել այն եւ արտադրել հակամարմիններ:
Փոխարենը, mRNA պատվաստանյութերը հրահանգում են բջիջներին՝ ստեղծել վարակի մակերեսին հայտնաբերված սպիտակուցի անվնաս մասը, որն առաջացնում է COVID-19: Այս սպիտակուցը ստեղծելուց հետո բջիջները կարող են ճանաչել իրական վարակը եւ պայքարել դրա դեմ։
