Համաճարակային իրավիճակը կարելի է համարել մի փոքր լարված, քանի որ վերջին շրջանում նկատում ենք դեպքերի աճ։ Այս մասին օրերս Շանթ հեռուստաընկերության եթերում ասել է ԱՆ ՀՎԿԱԿ-ի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:
Նա նշել է, որ գրանցվել է նոր դեպքերի 206 տոկոս աճ։
«Վարակի վերարտադրողական ցուցանիշը մեկից բարձր է և կազմում է 1,47 տոկոս, ինչը խոսում է վարակի տարածման տեմպերի արագացման մասին։ Հիվանդացության ցուցանիշը բարձրացել է բոլոր տարիքային խմբերում, այդ թվում մինչև 18 տարեկան երեխաների շրջանում։ Եվրամիության չափանիշներով ՀՀ-ը գտնվում է նարնջագույն գոտում»,-նշել է նա։
Աբովյանը նաև հայտնեց, որ հիվանդացության աճ նկատվում է ամբողջ աշխարհում։
«ԱՀԿ-ը արդեն մատնանշում էր, որ շատ երկրներում շրջանառվում է օմիկրոն տեսակի նոր ենթատեսակը՝ BA4 և BA5-ը, որն ավելի վարակիչ է քան նախորդ ենթատեսակները։ Նշեմ, որ ՀՀ տարածքում ևս շրջանառվում է BA4 և BA2 տեսակը, ինչն ապացուցվել է լաբորատոր հետազոտությունների արդյունքում»,-ասել է Աբովյանը։
Ըստ Աբովյանի՝ վերջին մի քանի ամիսների ընթացքում նկատվել էր հիվանդացության թվերի նվազում, ինչը նաև պայմանավորված էր նրանով, որ շատ մարդիկ պատվաստվեցին այդ ժամանակ։
Լ․Հակոբյան
