Պորտուգալիայի մոլեկուլային բժշկության ինստիտուտի գլխավոր հետազոտող, նյարդավիրաբույժ Կլաուդիա Ֆարիայի գլխավորությամբ նոր հետազոտությունը, որը հրապարակվել է Cell Reports Medicine գիտական ամսագրում, թույլ է տվել ստեղծել մոդելների գրադարան՝ ուղեղի մետաստազների ուսումնասիրության համար, որոնք նմանակում են հիվանդությունը: Այս մոդելները կարող են կարեւոր գործիք լինել հիվանդությունը հասկանալու եւ յուրաքանչյուր հիվանդին հարմարեցված նոր թերապեւտիկ մոտեցումներ ցուցաբերելու համար:
«Մենք հավաքեցինք քաղցկեղով հիվանդների գլխուղեղի մետաստազները, որոնք առաջացել էին տարբեր օրգաններում տեղակայված ուռուցքներից, եւ օգտագործեցինք այդ մետաստատիկ բջիջները՝ ստեղծելու հիվանդության մոդելներ, որոնք ընդօրինակում են յուրաքանչյուր հիվանդի հիվանդությունը, ներառյալ քաղցկեղի բջիջների տարածումը մետաստազներ ձեւավորելու համար»,-ասել է նյարդավիրաբույժը:
Հետազոտության հեղինակներից Ռիտա Կասկաոյի խոսքով՝ իրենց փորձերի համար գիտնականներն օգտագործել են մկան մոդել՝ ավելացնելով գլխուղեղի ուռուցքային հյուսվածքը, որը ստացվել է անմիջապես վիրահատական բուժման ենթարկվող հիվանդներից։
Գիտնականները փորձարկել են երկու հայտնի դեղամիջոց, որոնք ներկայումս օգտագործվում են կլինիկայում քաղցկեղի բուժման համար եւ գործում են մետաստազների ձեւավորման հետ կապված գործընթացների վրա։ Ինչպես կլինիկայում, այս դեղամիջոցներն արդյունավետ են եւ նվազեցնում են ուռուցքների աճն ու չափը մոդելներում: Փորձարկելով այս ավանդական թերապիաները եւ ցուցադրելով դրանց արդյունավետությունը՝ հետազոտողները ցույց են տվել մոդելների ներուժը՝ ապագայում գլխուղեղի մետաստազների բուժման նոր թերապեւտիկ մոտեցումներ ուսումնասիրելու համար, գրում է News Medical Life Sciences-ը:
