Վերջին շաբաթների ընթացքում նկատվում է կորոնավիրուսի թվերի նվազում։ Պատկերը հուսադրող է նաև ՀՀ-ում։ Այսօր, ապրիլի 7-ին հաստատվել է կորոնավիրուսի հաստատման 19 նոր դեպք։ Մահվան դեպք չի գրանցվել։
Այսպիսով, հաստատվել է կորոնավիրուսային հիվանդության ընդհանուր 422 629 դեպք, որոնցից 410 270-ը՝ առողջացած:
Կորոնավիրուսի Հայաստան «մուտք գործելուց» մինչ այսօր գրանցվել է մահվան 8619 դեպք։
Ընդհանուր կատարվել է 2 991 158 թեստավորում:
Օր օրի վարակվածության ու մահերի թվերը բարեբախտաբար նվազում են, բայց ՀՀ ԱՆ-ն շարունակում է զգոնության կոչեր անել և հիշեցնել, որ Քովիդի դեմ պատվաստումները լավագույն տարբերակն են այս համավարակի դեմ պայքարելու համար։ Բայց մի՞թե չի նկատվում հիվանդության նահանջ և արդյո՞ք այն չի վերածվում սովորական վիրուսի, որի հետ ապրել մարդիկ արդեն իսկ համակերպվել են։
Գործադիրն էլ այսօր, ապրիլի 7-ին չզեկուցվող նախագծերի թվում որոշում ընդունեց Հայաստանի քաղաքացիների, ինչպես նաև նրանց՝ ՀՀ քաղաքացի չհանդիսացող ընտանիքի անդամների՝ հանրապետության տարածք մուտք գործելուց հետո, մեկուսացման 14 օրացույցային օրը փոխարինել 10 օրացուցային օրով: Որոշումով նաև դրույթ կսահմանվի, ըստ որի՝ մեկուսացման ժամանակահատվածում ՊՇՌ հետազոտության նմուշառման օրվանից հաշված 7-րդ օրը մեկուսացված անձինք իրենց նախաձեռնությամբ կարող են անցնել ՊՇՌ հետազոտություն և բացասական արդյունքի դեպքում դուրս գալ մեկուսացումից:
Որոշմամաբ նաև սահմանվում է, որ ՀՀ տարածք օդային և ցամաքային սահմանային անցման կետերով մուտք գործելիս հիվանդության ներբերման և տարածման կանխարգելման, ինչպես նաև արագ հայտնաբերման նպատակով՝ ընդունելի կլինի նաև կորոնավիրուսային հիվանդության հարուցչի հակածնի հայտնաբերման արագ ախտորոշիչ թեստի բացասական արդյունքը հավաստող տեղեկանքը, որը կնվազեցնի նաև ֆինանսական բեռը:
Իսկ արդյո՞ք արժի մտածել քովիդին հրաժեշտ տալու մասին, Medmedia.am-ի հետ զրույցում հանրային առողջության մասնագետ Դավիթ Մելիք Նուբարյանը նշել էր, որ համավարակը գնում է դեպի մարում, սակայն հրաժեշտ տալու մասին դեռ վաղ է խոսել․
«Մեծ է հավանականությունը, որ նոր կորոնավիրուսային հիվանդությունը կդառնա մարդկության մոտ շրջանառվող հերթական վարակը, ժամանակ առ ժամանակ առաջացնելով բռնկումներ։ Նաև մենք պետք է մշտապես պատրաստ լինենք վիրուսի նոր տեսակների առաջացմանը, քանի որ դա գործընթաց է, որի վրա մենք էական ազդեցություն չունենք»,-նշել էր նա։
Ս․ Ասատրյան
