Ո՞ր սովորություններից պետք է հրաժարվել 40-ից հետո եւ որոնք ձեռք բերել առողջության պահպանման համար։ Այս մասին իր կարծիքն է հայտնել ամերիկացի բժիշկ Ջերի Բեյլին։
Ըստ Eat This, Not That!-ի՝ միջին տարիքի մարդկանց խորհուրդ է տրվում կանոնավոր մարզվել:
«Զբաղվածության պատճառով ֆիզիկական վարժություններից հրաժարվելը ծերացումն արագացնելու եւ օրգանիզմի հիվանդություններին դիմակայելու կարողությունը նվազեցնելու գլխավոր ճանապարհն է»,- նշել է նա:
Բացի այդ, ըստ Բեյլիի, մարզվելը կանանց մոտ դաշտանադադարի սկիզբը եւ տղամարդկանց պտղաբերության անկումը հետաձգելու լավագույն միջոցներից մեկն է, քանի որ մարզումն օգնում է մկանային զանգվածը պատշաճ մակարդակի վրա պահել եւ խթանել հորմոնների արտադրությունը:
Բեյլին 40 տարեկանից բարձր մարդկանց խորհուրդ է տալիս կանոնավոր ձգումներ կատարել՝ մեջքի ցավը, հոդացավերը եւ շարժումների ընդհանուր կաշկանդվածությունը կանխելու համար:
Ինչ վերաբերում է սննդակարգին, ապա մասնագետը խորհուրդ է տալիս խանութից հրաժարվել կիսաֆաբրիկատներից եւ գործարանային արտադրության ցանկացած սննդամթերքից։ Այդ մթերքներում պարունակվող շաքարը, արհեստական քաղցրացուցիչները եւ կոնսերվանտները մեծացնում են մարսողական համակարգի եւ հատկապես ենթաստամոքսային գեղձի ծանրաբեռնվածությունը, ինչը կարող է նպաստել բազմաթիվ քրոնիկ հիվանդությունների, այդ թվում՝ շաքարախտի զարգացմանը:
Բեյլին նաև խորհուրդ է տալիս 40 տարեկանից հետո հրաժարվել ալկոհոլից:
«Որոշ հետազոտություններում ասվում է, որ ժամանակ առ ժամանակ ալկոհոլի օգտագործումը կարող է օգտակար լինել, բայց դրա սիստեմատիկ օգտագործումն առողջական խնդիրների է հանգեցնում»,- ասել է բժիշկը:
Նրա խոսքով՝ ալկոհոլից հրաժարվելը կօգնի բարելավել լյարդի աշխատանքը, նվազեցնել բորբոքային պրոցեսների ինտենսիվությունն օրգանիզմում եւ դրականորեն կազդի ուղեղի ճանաչողական ֆունկցիայի վրա։
