Շիրակի մարզում դեկտեմբերի 24-ի դրությամբ կորոնավիրուսի դեմ երկու դեղաչափով պատվաստվել է 47028 մարդ՝ բնակչության 26․7 տոկոսը, իսկ 1 դեղաչափ ստացել է 68728 մարդ, որը կազմում է չափահաս բնակչության 39 տոկոսը:
Այս մասին մարզային խորհրդի նիստի ժամանակ տեղեկացրեց Շիրակի մարզպետարանի առողջապահության և սոցիալական ապահովության վարչության պետի պարտականությունները կատարող Լեյլի Ասլանյանը: Ինչպես տեղեկացնում է «Արմենպրես»-ը, պատվաստվել են մարզի պետական կառավարման մարմինների աշխատակիցների 95.5 տոկոսը, առողջապահական համակարգի աշխատակիցների 95․2 տոկոս և ուսումնական հաստատությունների աշխատակիցների 94.1 տոկոս: Ընդհանուր առմամբ մարզում կորոնավիրուսի դեմ պատվաստվել է 68728 մարդ, որը չափահաս ազգաբնակչության 39%-ն է կազմում։
Շիրակի մարզպետ Նազելի Բաղդասարյանը ցուցանիշները ոչ բավարար է համարում և հորդորում համայնքների ղեկավարներին այս գործընթացում աջակցել առողջապահության համակարգին, լինել առավել զգոն։