Թբիլիսիի ինֆեկցիոն հիվանդանոցի տնօրեն Մարինա Էզուգբայայի խոսքով՝ Վրաստանում կորոնավիրուսով վարակված առաջին պացիենտը, ըստ նախնական տվյալների, առողջացել է։
Բժիշկը նշել է, որ նախօրեին պացիենտը թեստավորում է անցել և գրանցվել է բացասական արդյունք, ինչը նշանակում է, որ, ըստ նախնական տվյալների, քաղաքացու մոտ կորոնավարակ չկա։ Սակայն բժիշկը հայտնել է, որ 24 ժամվա ընթացքում պացիենտը ևս մեկ թեստավորում պետք է անցնի՝ կորոնավարակն ամբողջությամբ բացառելու նպատակով։
«Գիտեք, որ Վրաստանում կորոնավիրուսով վարակված առաջին դեպքը հաստատվել էր փետրվարի 26-ին, երեկ անցկացված թեստավորման արդյունքները բացասական են եղել, առաջիկայում կանցկացվի երկրորդ թեստավորումը, և եթե այս անգամ էլ բացասական արդյունք գրանցվի, վստահաբար կարող ենք ասել, որ պացիենտն առողջացել է։ Հուսով ենք, որ այդպես էլ կլինի»,-ասել է Էզուգբայան։
Հիշեցնենք, որ Վրաստանում նոր կորոնավիրուսի առաջին դեպքը հաստատվել էր փետրվարի 26-ին: Վիրուսը հայտնաբերվել է 50-ամյա մի տղամարդու մոտ, ով Վրաստան էր եկել Իրանից։
