Առողջապահության համաշխարհային կազմակերպությունը հայտնել է, որ Եվրոպայում վերջին մեկ շաբաթվա ընթացքում կորոնավիրուսից մահվան դեպքերն աճել են 10%-ով։ Այսպիսով, Եվրոպան աշխարհում միակ տարածաշրջանն է, որտեղ COVID-19-ով հիվանդացության և վիրուսից մահվան դեպքերը կայուն աճում են։
The Guardian պարբերականի փոխանցմամբ՝ արդեն 6 օր շարունակ Եվրոպայում վիրուսի տարածումն աճում է. մայրցամաքի երկրներից շատերը պայքարում են կորոնավիրուսի 4-րդ կամ 5-րդ ալիքի դեմ։
Ըստ ԱՀԿ-ի՝ ընդհանուր առմամբ աշխարհում վերջին մեկ շաբաթվա ընթացքում հաստատվել է կորոնավիրուսի 3,1 միլիոն նոր դեպք՝ նախորդ շաբաթվա համեմատությամբ 1%-ով ավելի։ Նոր դեպքերի 2/3-ը՝ 1,9 միլիոնը, բաժին է ընկնում Եվրոպային։
Իսկ աշխարհում կորոնավիրուսից մահվան դեպքերի թիվը մեկ շաբաթում նվազել է 4%-ով։ Մահվան ցուցանիշի նվազում է դիտվել բոլոր տարածաշրջաններում՝ բացի Եվրոպայից։
Աշխարհում ամենամեծ թվով նոր դեպքեր գրանցած երկրներն են ԱՄՆ-ն, Ռուսաստանը, Բրիտանիան, Թուրքիան և Գերմանիան։
