Մասնագետները հաճախ են նախազգուշացնում, որ սնվելուց հետո չի կարելի հորիզոնական դիրք ընդունել։ Ավելին՝ շատերն անգամ խորհուրդ չեն տալիս նստել՝ հորդորելով զբոսնել կամ որևէ այլ ակտիվություն ցուցաբերել։ Սակայն ոչ բոլորին է հայտնի՝ ինչով է պայմանավորված նման խորհուրդն ու ինչու չի կարելի անմիջապես սնվելուց հետո պառկել կամ նստել։
Ինչպես aif.ru-ի հետ զրույցում ասել է գաստրոէնտերոլոգ Սերգեյ Վյալովը, նման խորհուրդը պայմանավորված է նրանով, որ հորիզոնական դիրք ընդունելու դեպքում ստամոքսի պարունակությունը կարող է հայտնվել կերակրափողումը, ինչը բավական վտանգավոր է։ Բանն այն է, որ սննդի մարսման պահին ստամոքսը լի է լինում նաև ստամոքսահյութով, որն էլ կարող է վնասել կերակրափողը։
Ընդ որում՝ ստամոքսահյութի՝ կերակրափողում հայտնվելը սնվելուց հետո հորիզոնական դիրք ընդունելու սովորության ամենավտանգավոր հետևանքը չէ։ Մասնագետի խոսքով՝ կանոնավոր սնվելուց հետո հորիզոնական դիրք ընդունելու դեպքում զարգանում է բավական վտանգավոր քրոնիկ հիվանդություն, որն էլ կարող է հանգեցնել քաղցկեղի զարգացման։
«Եթե նա (մարդը-խմբ․) կանոնավոր է անում դա, օրինակ՝ սովորություն ունի քնելուց անմիջապես առաջ սնվելու կամ պարզապես սիրում է պառկել սնվելուց հետո, ապա որոշ ժամանակ անց սա կարող է հանգեցնել ռեֆլյուքսային հիվանդության, որի դեպքում ստամոքսի պարունակությունը հայտնվում է կերակրափողում ու այրում այն», – բացատրել է բժիշկը։