«Գյումրի» բժշկական կենտրոնն այլևս չի ընդունում COVID դրական թեստով հիվանդներին: Նման որոշում է կայացվել` ելնելով վերջին օրերին բժշկական կենտրոն դիմող հիվանդների թվի նվազումից: Այս մասին SHANTNEWS-ին ասել է «Գյումրի» ԲԿ տնօրեն Արմեն Իսահակյանը:
Հիշեցնենք, կորոնավիրուսի տարածման նախորդ երկու ալիքների ընթացքում «Գյումրի» բժշկական կենտրոնում նախ տրիաժ, ապա նաև COVID բաժանմունք բացվեց: COVID բաժանմունքը գործում է 60 մահճակալ հզորությամբ և հոսպիտալացվում են ծանր դեպքերը: «Գյումրի» ԲԿ-ն միակն է Շիրակի մարզում, որը բժշկական բազմապրոֆիլ ծառայություն է իրականացնում: Հիմա որոշում է կայացվել, որ բաժանմունքը կորոնավիրուսով վարակված նոր հիվանդների չի ընդունելու, իսկ հոսպիտալացվածները կշարունակեն բուժումը բաժանմունքում:
«Վերջին մի քանի օրերի ընթացքում թվերի նվազում է գնացել և որոշում կայացվեց, որ բաժանմունքը դադարեցնի աշխատանքը: Մնում են միայն դուրս գրվող հիվանդները: Այս պահին մեզ մոտ 50 հիվանդ ունենք:Այսինքն, COVID բաժանմունքը ոչ թե փակվել է, այլ մենք չենք ընդունում նոր հիվանդների: Պառկած հիվանդներ ունենք, որոնք շարունակելու են բուժումը: Կարող է 5,10 կամ 15 օր էլ մնան ու բուժվեն: Հիվանդները կընդունվեն տրիաժ բաժանմունք, որտեղ կիրականացվի հետազոտություն և COVID դրական պատասխանով հիվանդները կտեղափոխվեն Երևանի հիվանդանոցներ »,-SHANTNEWS-ին ասել է «Գյումրի» բժշկական կենտրոնի տնօրեն Արմեն Իսահակյանը:
Նա նաև նշել է, որ Շիրակի մարզում օրական թեստավորումների քանակն է նվազել: Մայրաքաղաքի բուժհաստատությունների COVID բաժանմունքներում ազատ մահճակալներ կան: Երևանի որոշ բուժհաստատություններում ևս COVID բաժանմունքները փակվել են:
Աղբյուրը` Shantnews.am
