«Գրիգոր Լուսավորիչ» ԲԿ-ի բուժքույրերից Ժենյա Մկրտչյանն ասել է, որ անհիմն կերպով մեծաթիվ մարդկանց փորձում են ազատել աշխատանքից՝ ասելով՝ եկեք, դիմում գրեք, կամ էլ այնպես կգրենք, որ ուրիշ տեղ աշխատանքի չեք ընդունվի։
«Ինչ-որ մեկը հարձակվեց վրաս, ուզում էր հարվածել, հայհոյեց: Ի՞նչ իրավունքով են ինձ ասում, դու պետք է դիմում գրես, գնաս: Միայն ինձ չէ, տարբեր բաժիններից մարդկանց ստիպում են, որ գրեն ազատման դիմումներ, 8 հոգու վերակենդանացման բաժանմուքից են ազատել: Ամեն բաժիններից էլ ազատում են՝ բերելով իրենց մարդկանց՝ մորքուրի, հորքուրի աղջիկներին, մեկը մյուսի հարսին է բերում, մեկը մյուսի տալի աղջկան է բերում՝ ազատելով մնացածին»,- պատմել է Ժենյա Մկրտչյանը:
Այս առիթով Medmedia լրատվականը կապ հաստատեց ԲԿ-ի մամուլի խոսնակ Ծովինար Խաչատրյանի հետ՝ պարզաբանում ստանալու նպատակով։
«Անհիմն կերպով ոչ ոք աշխատանքից չի ազատվել։ Ընդամենը եղել է աշխատանքային պարտականությունների խիստ թերացում, որին հաջորդել է համարժեք «պատիժը»։ Սա փրփուրներից կախվելու հնարավորություն է․ բոլոր լրատվամիջոցներին, որոնց ճանաչում է, կամ որոնց խորհուրդ են տվել, փորձում է այլ գույներով ներկայացնել իրականությունը »,-նշեց Ծովինար Խաչատրյանը։
Նա ընդգծեց, որ իրականությունն այլ է․ աշխատանքի ընդունումներն ու ազատումներն աշխատանքային պրոցեսներ են, որը տեղի է ունենում ցանկացած հիմնարկությունում՝ անկախ նրանից՝ դա բուժկենտրոն է, կրթական հաստատություն, թե այլ։
«Սա անձանց խնդիր է, թե ովքեր ինչպես են փորձում արդարանալ, իրենց աշխատանքային թերացումներն այլ ֆոնով և գույներով ներկայացնել, որպեսզի իրավիճակից օգտվեն, այլ ոչ թե համարժեք պատիժ կրեն»,- պարզաբանեց մամուլի խոսնակը։
Ծովինար Խաչատրյանը հավելեց, որ խոսքը վերաբերում է Ժենյա Մկրտչյանի հերթափոխի մարդկանց, քանի որ նա միակը չէ, ով թերացել է։
Սառա Հարությունյան
