Լյարդի ոչ ալկոհոլային ճարպային հիվանդություն ունեցող պացիենտների մոտ լյարդի քաղցկեղի ռիսկը 17 անգամ մեծանում է: Այս մասին են վկայում Hepatology ամսագրում հրապարակված հետազոտության արդյունքները:
Ինչպես հայտնում է Medportal.ru-ն, Կառոլինայի ինստիտուտի եւ Կոլումբիայի համալսարանի գիտնականները վերլուծել են գրեթե 40 000 պացիենտների տվյալները, որոնց հետեւել են 1966- 2016 թվականներին: Այդ ժամանակահատվածում նրանցից գրեթե 9000-ի մոտ հայտնաբերվել է լյարդի հյուսվածքաբանորեն հաստատված ոչ ալկոհոլային ճարպային հիվանդություն (NAFLD):
Հետազոտությունը պարզել է, որ ոչ ալկոհոլային ճարպային հիվանդությունը 27%-ով մեծացնում է ցանկացած տեսակի քաղցկեղի հավանականությունը: Ռիսկի մեծ մասը բաժին է ընկնում լյարդի քաղցկեղին՝ դրա զարգացման հավանականությունը 17 անգամ ավելին է, քան այն մարդկանց մոտ, ովքեր չունեն այս հիվանդությունը: Հետաքրքիր է, որ այս ռիսկը սկսում է աճել հիվանդության վաղ փուլերում:
Ոչ ալկոհոլային ճարպային հիվանդությունը կապված է նաեւ ենթաստամոքսային գեղձի, երիկամների, միզապարկի չարորակ ուռուցքների եւ մելանոմայի ռիսկի փոքր աճի հետ, բայց ոչ այլ տեսակի քաղցկեղների։