AstraZeneca ընկերությունն աշխատում է կորոնավիրուսի դեմ իր դեղամիջոցով պատվաստվելուց հետո թրոմբոզի առաջացման պատճառները պարզելու ուղղությամբ՝ միևնույն ժամանակ շեշտելով, որ խոսքը գնում է չափազանց հազվագյուտ դեպքերի մասին։ Այս մասին հաղորդվում է ընկերության կայքում։
AstraZeneca-ն հաղորդում է, որ Մեծ Բրիտանիայի Դեղամիջոցների և առողջապահական ապրանքների կարգավորող գործակալությունը (MHRA) և Դեղամիջոցների հարցերով եվրոպական գործակալությունը (EMA) իրենց գնահատականն են տվել կորոնավիրուսի դեմ AstraZeneca-ի պատվաստանյութով պատվաստված շուրջ 34 միլիոն պատվաստվածների շրջանում արյան թրոմբոզի չափազանց հազվագյուտ դեպքերին։
Ընկերությունը հաղորդում է, որ կարգավորող մարմինները պահանջել են պատվաստանյութի մասին տեղեկությունում փոփոխություններ կատարել և նշել թրոմբոզի առաջացման հազվադեպ կողմնակի ազդեցության մասին։ AstraZeneca-ն նաև շեշտում է, որ կարգավորող մարմիններից ոչ մեկը չի առանձնացրել այնպիսի ռիսկի գործոն, ինչպիսիք են տարիքը կամ սեռը, ինչպես նաև չի առանձնացրել նշված դեպքերի համար հստակ պատճառ։
Ընկերությունը հայտնում է, որ Առողջապահության համաշխարհային կազմակերպությունը, հիմնվելով առկա տեղեկությունների վրա, հայտարարել է, որ պատճառահետևանքային կապը հնարավոր է, սակայն ոչ հաստատված։ ԱՀԿ-ն հավելել է, որ պատվաստման և ռիսկի հնարավոր գործոնների միջև հնարավոր կապը հասկանալու համար անհրաժեշտ են լրացուցիչ մասնագիտացված ուսումնասիրություններ։
Հիշեցնենք՝ AstraZeneca-ի պատվաստանյութի մասին եվրոպական և բրիտանական կարգավորող մարմինների կողմից տրված եզրակացություններից հետո եվրոպական մի շարք երկրներ պատվաստանյութի օգտագործման հետ կապված տարիքային սահմանափակումներ են մտցրել։
