Բատի համալսարանի գիտնականները պարզել են, որ ծխախոտից հրաժարվելը մարդուն ավելի երջանիկ է դարձնում։ Մասնագետները նման եզրահանգման են եկել այն բանից հետո, ինչ վերլուծել են մի շարք հետազոտությունների արդյունքները, որոնց մասնակցել է մոտ 150 հազար կամավոր։
Շատերը կարծում են, որ այս վատ սովորությունից հրաժարվելը կարող է դառնալ լուրջ սթրեսի պատճառ, ինչի հետևանքով էլ շարունակում են ծխախոտ օգտագործել, սակայն իրականում ծխախոտից հրաժարվելը շատ օգտակար է ոչ միայն ֆիզիկական, այլև հոգեկան առողջության համար։ Հետազոտությունները ցույց են տվել, որ 6 շաբաթ շարունակ ծխախոտ չօգտագործելու դեպքում անհանգստության ու սթրեսի մակարդակը զգալիորեն նվազում է։ Ընդ որում՝ մարդկանց վիճակը կայունանում է անգամ հոգեկան խանգարումների առկայության դեպքում, մինչդեռ նման խնդիրներով մարդիկ ծխախոտը հաճախ օգտագործում են ինքնաբուժության նպատակով, քանի որ մտավախություններ են ունենում, որ սթրսի հետևանքով կարող են այլ բարդություններ ի հայտ գալ։
Հետազոտության հեղինակներն ընդգծում են, որ մարդիկ, որպես կանոն, որոշում են հրաժարվել այս կախվածությունից ֆիզիկական խնդիրների ախտորոշումից հետո, այլ ոչ թե հոգեբանական։ Ընդ որում, շատերն անհանգստանում են ծխելը թողնելու ֆոնին հնարավոր հոգեհուզական հետևանքների առաջացումից։ Այնուամենայնիվ, գիտական աշխատանքների վերլուծությունը ցույց է տվել, որ նման սպառնալիքներ չկան: Ավելին՝ գիտնականները պարզել են, որ այն մարդիկ, ովքեր կարողացել են կամքի ուժ դրսևորել ու ազատվել կախվածությունից, հետագայում շատ ավելի երջանիկ են լինում:
Նյութի աղբյուրը՝ actualnews.org
