Իրանը պաշտոնապես սկսել է ռուսական «Սպուտնիկ V» պատվաստանյութով COVID-19-ի դեմ պատվաստման համապետական արշավը ՝ առաջին փուլում պատվաստելով բուժաշխատողներին
Ըստ Press TV- ի` պատվաստումը սկսվել է երեքշաբթի օրը, Թեհրանի Իմամ Խոմեյնիի հիվանդանոցում կայացած միջոցառման ժամանակ, որտեղ COVID-19 պատվաստանյութը նախ ներարկվել է առողջապահության նախարար Սաիդ Նամաքիի որդուն՝ Պարսա Նամաքիին:
«Այսօր 625 հիվանդանոցներում միաժամանակ սկսվում է բուժքույրերի, բժիշկների և ինտենսիվ թերապիայի բաժանմունքի անձնակազմերի պատվաստումը:
Ինտենսիվ թերապիայի բաժանմունքի աշխատակիցներից հետո պատվաստումները հետզհետե ընդլայնվելու են՝ ներառելով այլ խոցելի խմբեր: Դրանից հետո կպատվաստվեն 65-ից բարձր տարիքի մարդիկ, հիվանդություններ ունեցողներն ու այլ թիրախային խմբեր, որպեսզի ի վերջո բնակչության ավելի քան 70 տոկոսը պատվաստված լինի», – ասել է նախարարը:
Պատվաստումները սկսվել են նախագահ Հասան Ռոուհանիի պատվերով, որը վստահեցրել է ժողովրդին, որ ներմուծվող պատվաստանյութերն անվտանգ և հուսալի են:
«Ժողովուրդը պետք է վստահ լինի, որ իշխանությունները վստահում են ներմուծված պատվաստանյութերին, և, որպես պաշտոնյաներ, մենք բոլորս պատրաստ ենք պատվաստվել՝ վստահություն ստեղծելու համար», – ասել է նա:
Նշենք, որ Իրանը Ռուսաստանից է ներմուծել «Սպուտնիկ V» պատվաստանյութը և նախատեսում է դրա համատեղ արտադրություն Մոսկվայի հետ: Ռուսական պատվաստանյութի առաջին խմբաքանակը Թեհրան է բերվել անցյալ շաբաթ:
Սննդամթերքի և դեղամիջոցների կազմակերպության խոսնակ Քիանուշ Ջահանփուրն ասել է, որ Իրանն արդեն ստացել է «Սպուտնիկ V» պատվաստանյութի տասնյակ հազարավոր դեղաչափեր:
Դրանք կներարկվեն օրական 1000 մարդու, և ցուցանիշը մեծապես կաճի՝ առավելագույն մակարդակի հասնելու համար», – ավելացրել է նա:
Իրանը նաև գնել է 16.8 միլիոն դեղաչափ պատվաստանյութ COVAX- ից, որը զբաղվում է ցածր և միջին եկամուտ ունեցող երկրներում պատվաստանյութերի արդար հասանելիության ապահովմամբ
Միևնույն ժամանակ, իրանցի գիտնականներն աշխատել են կորոնավիրուսի դեմ տեղական պատվաստանյութերի մշակման վրա, որոնցից երկուսը գտնվում են մարդկանց վրա փորձարկման փուլում: