Առողջապահության նախարարությունը արձագանքել է ԱԺ ԼՀԿ խմբակցության պատգամավոր Մանե Թանդիլյանի գրառմանը: Նրանք կոչ են անում պատգամավորին առողջապահության ոլորտին վերաբերող հարցերը հրապարակելուց առաջ ճշտել նախարարության հետ:
Առողջապահության նախարարությունը նշել է, որ իրենց քաղաքականության առաջնահերթություններից է երեխաների առողջության պահպանումը, ուստի դրան միտված ծրագրերը, բնականաբար, չեն դադարեցվելու և նպատակ չի էլ կարող լինել:
«Հաղթահարենք դիաբետը միասին» 5-ամյա ծրագիրը մեկնարկել է 2015 թվականի նոյեմբերից և ուժի մեջ է մինչև 2020-ի նոյեմբերը: Ծրագրի շահառուներն են 0-22 տարեկան տարիքային խմբի հաշվառված ինսուլինակախյալ երեխաները և երիտասարդները: Այն միտված է նրանց կյանքի որակը բարձրացնելուն: Ծրագիրն ունի նաև բարեգործական բաղադրիչ, որի շրջանակներում տրամադրվում են գրիչ-ներարկիչներ, ասեղներ, իրականացվել է դիաբետի կառավարման 4 կենտրոնի վերանորոգում և կահավորում, ինչպես նաև այդ 4 կենտրոնում տեղադրվել են գլիկոլիզացված հեմոգլոբինի չափման անալիզատորներ և դրանց համար նախատեսված թեստ-երիզներ:
Նախարարությունն ընդգծել է, որ ծրագրի ավարտին դեռ շատ ժամանակ կա, իսկ երեխաները դեղերով ապահովված կլինեն ընդհուպ մինչև 2021թ. մարտը: Ավելին` ծրագրի շարունակականությունն ապահովելու համար նախարարությունը նախատեսում է գարնանը գնման ընթացակարգով հայտարարել նոր մրցույթ: Եվ իրենց հասկանալի չէ ոչ ծնողների, առավել ևս ոչ էլ պատգամավորի մտահոգությունն այս հարցում:
Հավելենք նաև, որ 2015 թվականից սկսած նախարարությունը տրամադրում է նաև արյան մեջ գլյուկոզայի որոշման թեստ-երիզներ, որոնք մինչև 2019 թվականը տրամադրվել են յուրաքանչյուր երեխային ամսական 1 տուփ, իսկ 2019 թվականից սկսած` 2-ական տուփ: Այս ծրագիրը ևս շարունակական է և ընդհատումներ երբեք չեն եղել:
Հիշեցնենք, որ Մանե Թանդիլյանի գրառումը`
«Եթե Առողջապահության նախարարությունը ավելի լավ առաջարկ ունի այս ընտանիքներին և երեխաներին, թող ներկայացնի։
Եթե ոչ, բացատրություն չունի ծրագրի դադարեցումը, որը թեթևացնում է այս ընտանիքների և երեխաների խնդիրը։
Առաջարկում եմ Առողջապահության նախարարության որոշում կայացնողներին ականջալուր լինել ծնողներին, որոնցից որոշները նաև արձագանք են թողնում գրառման տակ»