ՌԴ հատուկ նշանակության բժշկական ջոկատի ստորաբաժանումները Ստեփանակերտում դաշտային հոսպիտալ են տեղակայել։ Նախօրեին բժշկական ստորաբաժանումները Երևանից Ստեփանակերտ էին տեղափոխվել ավտոշարասյան կազմում՝ ռուսական խաղաղապահական զորակազմի և ռազմական ոստիկանության պարեկային ծառայության ուղեկցությամբ, հաղորդում է ՌԴ պաշտպանության նախարարությունը։
Դաշտային հիվանդանոցը տեղակայվել է Ստեփանակերտի օդանավակայանի տարածքում։ Գերատեսչությունից հաղորդում են, որ բժշկական հատուկ ջոկատի ստորաբաժանման մասնագետները կկազմակերպեն խաղաղապահ զորակազմի բուժսպասարկումը և անհրաժեշտ բուժօգնություն կցուցաբերեն Լեռնային Ղարաբաղի բնակչությանը։ Հոսպիտալի տարածքում կարող է տեղավորվել մինչև 40 մարդ։
Առաջին ստորաբաժանման կազմում ԼՂ է ժամանել ավելի քան 40 մասնագետ, այդ թվում՝ զինվորական վիրաբույժներ, անեսթեզիոլոգ-ռեանիմատոլոգներ, թերապևտներ և համաճարակաբաններ։