Ստեփանակերտի մարդասիրական արձագանքման միջգերատեսչական կենտրոնը լիարժեք կգործի ուրբաթ օրվանից, ասել է Ռուսաստանի Դաշնության պաշտպանության կառավարման ազգային կենտրոնի ղեկավար, գեներալ-գնդապետ Միխայիլ Միզինցևը՝ նշելով, որ Լեռնային Ղարաբաղում արյունահեղության դադարեցումից հետո առաջին պլան են մղվել հումանիտար խնդիրները:
«Ռուսաստանի բարձրագույն ռազմաքաղաքական ղեկավարության կողմից ընդունված արագ որոշումների շնորհիվ հնարավոր եղավ դադարեցնել արյունահեղությունը Լեռնային Ղարաբաղի գոտում: Ներկայումս ռուս խաղաղապահները հաջողությամբ կատարում են տարածաշրջանում խաղաղ կյանքի հաստատման հետ կապված միջոցառումների մի ամբողջ շարք: Այսօր հումանիտար բնույթի խնդիրներ են մղվում: Այդ նպատակով Ստեփանակերտում մարդասիրական արձագանքման միջգերատեսչական կենտրոնը կսկսի լիարժեք գործել»,- ուրբաթ օրը՝ նոյեմբերի 20-ին, ասել է Միզինցևը միջգերատեսչական համագործակցությանը նվիրված խորհրդաժողովում:
Կենտրոնի հիմնական խնդիրներն են մշտական բնակության վայրերը լքած քաղաքացիների վերադարձը, քաղաքացիական ենթակառուցվածքների վերականգնման հարցում Ադրբեջանին և Հայաստանին օգնությունը և բնակչության բնականոն կյանքի պայմանների ստեղծումը, Ռուսաստանի պետական մարմինների և կազմակերպությունների գործունեության համակարգումը` ռազմական գործողությունների արդյունքում տուժած շրջանների բնակիչներին մարդասիրական օգնություն տրամադրելու համար, տեղեկացրել է Միզինցևը: Կենտրոնը կոչված է նաև օժանդակելու Ադրբեջանի և Հայաստանի պետական մարմիններին միջազգային մարդասիրական կազմակերպությունների հետ փոխգործակցության կազմակերպման գործում:
Նա համոզմունք է հայտնել, որ «հետկոնֆլիկտային կարգավորման սիրիական փորձը կօգնի հնարավորինս սեղմ ժամկետում խաղաղ կյանք հաստատել այս տարածաշրջանում»:
