Միգրեն հիվանդության և դրա առաջացման պատճառների մասին կան բազմաթիվ թյուրըմբռնումներ և առասպելներ: Բայց փաստն այն է, որ մինչ այժմ այդ հիվանդության առաջացման պատճառները բժշկության մեջ պարզաբանված չեն:
Միգրենը բնորոշվում է պարբերաբար կրկնվող չափավորից մինչև ուժգին գլխացավերով: Սակայն, շատ հաճախ այն շփոթում են սովորական գլխացավերի հետ: Նման շփոթությունից խուսափելու համար նշենք, որ միգրենի ախտորոշման չափորոշիչները տրված են գլխացավն ուսումնասիրող Միջազգային ասոցիացիայի կողմից:
Ըստ այդ չափորոշիչների՝ միգրենն ուղեկցվում է 4-ից 72 ժամ տևող նոպայաձև գլխացավերով, գլխացավերն ունեն գոնե երկու հետևյալ բնութագրերը` գլխավորապես միակողմանի տեղակայում, կողմերի հաջորդում, հազվադեպ երկկողմանի, պուլսացող բնույթ, միջին կամ զգալի ինտենսիվություն (խանգարում է առօրյա գործունեությունը), ուժեղացումը ֆիզիկական ծանրաբեռնվածության ժամանակ, ինչպես նաև միգրենի դեպքում առկա է գոնե մեկ ուղեկցող ախտանիշի առկայություն` սրտխառնոց, փսխում, լուսավախություն, ֆոնոֆոբիա (վախ բարձր ձայներից):
Մեզ հետ զրույցում «Աստղիկ» ԲԿ-ի նյարդաբան Տաթև Մխիթարյանը նշեց, որ միգրենի առաջացման պատճառները, չնայած դեռ պարզաբանված չեն, սակայն դրա շուրջ կան մի շարք վարկածներ:
«Ցավը միգրենի ժամանակ նեյրոգեն, անոթային գործոնների ազդեցության հետևանք կարող է լինել: Միգրենի առաջացումը կապում են աուրայի, ինչպես նաև հորմոնալ խանգարումների հետ»:
Նշենք, որ ըստ նրա առաջացման պատճառների, առանձնացնում են միգրենի երկու տեսակներ՝ առանց աուրայի միգրեն (հասարակ միգրեն) և աուրայով միգրեն (ասոցիացված միգրեն): Հասարակ միգրենն ավելի հաճախ է հանդիպում, հենց այս տեսակն էլ բնորոշվում է վերևում թվարկված ցավային համախտանիշներով: Իսկ աուրայով միգրենի ժամանակ, որ համեմատաբար ավելի քիչ է հանդիպում, ցավային տիպիկ նոպայից առաջ աուրա է ձևավորվում, ի հայտ են գալիս կայծեր, կայծակային առկայծումներ հիշեցնող տեսողական խանգարումներ:
«Միգրենի բուժումը հիմնականում պրոֆիլակտիկ բնույթ ունի: Այն առավել շատ դեղորայքային է: Դեղորայքները միտված են նոպաների նվազեցմանը: Այժմ առավել շատ տարածված են տրիպտաները. Դրանք միգրենի դեպքում առավել արդյունավետ է օգտագործել հենց տրիպտաները հասարակ ցավազրկողների փոխարեն: »,- ասաց նյարդաբանը:
Իսկ այն հարցին, թե՞ արդյոք հղիության ընթացքում միգրենի ռիսկը նվազում է, բժիշկը պատասխանեց, որ դրանք պարզապես ենթադրություններ են, որ չունեն ոչ մի գիտական հիմք:
Սառա Հարությունյան