Առողջապահության նախարար Արսեն Թորոսյանը երեկ «Հրապարակ»-ի հետ զրույցում անդրադարձել է առողջապահական ապահովագրությանը:
Հիշեցնենք, որ ըստ առողջապահական փաթեթի՝ յուրաքանչյուր աշխատող քաղաքացի պետք է իր ամսական աշխատավարձի 6 տոկոսը վճարի պետությանը՝ որպես առողջապահական հարկ: Այս նախագծի վերաբերյալ քննարկումներ շատ եղան՝ մասնավորապես ասվում էր, որ այդ կերպ գրանցված աշխատողը ապահովագրում է թե՛ իր, թե՛ չաշխատող կամ աշխատող, բայց չգրանցված եւ ըստ այդմ՝ աշխատավարձի 6 տոկոսը չվճարող քաղաքացիների առողջությունը:
Առողջապահության նախարարը նշել է, որ փաստաթուղթը նորից կմշակվի և հնարավոր է՝ ենթարկվի փոփոխության՝ հաշվի առնելով գերատեսչություններից և հանրությունից ստացած բոլոր առաջարկները:
Նա հայտնել է, որ խնդիրը պակասող փողի քանակի մեջ է ավելի շատ եւ դրա աղբյուրների, իսկ այդ աղբյուրհների մասով որոշումը կկայացվի աստիճանաբար:
Իսկ այն հարցին, թե ինչու 1 մլն դրամ ստացողը պետք է վճարի 60 հազար դրամ, բայց ստանա նույն ծառայությունը, ինչ 100 հազար ստացող և 6 հազար դրամ հարկ վճարող քաղաքացին, նախարարը պատասխանել է.
«Այդ համակարգն ուղիղ սոցիալական արդարություն ապահովելու համար է ներդրվելու: Եվ սա սոցիալական ապահովության համակարգ է դա, ոչ թե կլասիկ ապահովագրության, եւ լուծում է ամբողջ հանրության կամ հանրության մեծամասնության ֆինանսական պաշտպանվածության հարցը եւ ոչ թե միայն որեւէ անհատի ապահովագրության հարցը: Նույն տրամաբանությամբ էսօր վճարում են մնացած բոլոր հարկերը, մենք բոլորս էլ հարկերը վճարում ենք տոկոսով մեր աշխատավարձից»: