Lրագրողների հետ ճեպազրույցում ԲՀԿ առաջնորդ Գագիկ Ծառուկյանը ԱԺ–ում ասաց, որ ծննդատների փակմանը բացասաբար է վերաբերվում։
Առողջապահական ոլորտում նախարարությունը փոփոխություններ է կատարել, որոնց համաձայն՝ տարեկան 150–ից պակաս ծնունդ ընդունող ծննդատները փակել։ Նախարարությունն այս տարի չի ֆինանսավորել Մարալիկի, Աչաջուրի, Արտենիի, Ծաղկահովիտի, Արծվաբերդի, Քաջարանի և Եղվարդի ծննդատներին։
«Ուզում ենք տնտեսական հեղափոխություն, ներգաղթ լինի։ Հիմա 30-35 գյուղի մեկ հիվանդանոց է սպասարկում, ու այն փակելը ճիշտ չի։ Այնպես որ, դա անելու բան չի, որ անում են»,–ասել է Ծառուկյանը։
Նա կարծիքով՝ փակելու փոխարեն` պետք է այդ ծննդատները պահեն ու զարգացնեն։
Հիշեցնենք, որ Եղվարդի ծննդատան աշխատողները երկու օր անընդմեջ բողոքի ակցիա էին արել։ Առողջապահության նախարարության պահանջած տարեկան 150 ծնունդ ցուցանիշին ամենամոտը Եղվարդի ծննդատան 2019–ի ցուցանիշն է (136 ծնունդ)։ Արսեն Թորոսյանը տեղեկացրել էր` Առողջապահության նախարարության մասնագետները ևս մեկ անգամ կայցելեն այնտեղ` ստուգայցի։
Հիշեցնենք նաև, որ վերջերս էլ Մարալիկ քաղաքի բնակիչներն փակել էին Գյումրի–Երևան ճանապարհը։ Նրանք պահանջում էին չեղարկել Մարալիկի առողջության կենտրոնի ծննդաբերական բաժանմունքի փակման որոշումը։ Ի դեպ, ըստ տվյալների` 2018 թվականին Մարալիկի առողջության կենտրոնի մանկաբարձական ծառայությունից օգտվել է 126 ծննդկան, իսկ 2019-ին` 105:
