Ազգային ժողով ներկայացված նախագծերից մեկով սահմանվում է, որ նորածին երեխայի սեռը պետք է գրանցվի նրա ծննդյան վկայականում։ Դրանից բացի՝ կարող է նշվել նաև ազգությունը, եթե ծնողները համաձայն են։ Խորհրդարանի քննարկումներից կարելի է եզրակացնել, որ ընդդիմադիր ԼՀԿ խմբակցության ներկայացրած նախագծին կողմ են նաև մյուս խմբակցությունները։
ԼՀԿ խմբակցության անունից պատգամավոր Արմեն Եղիազարյանը բացատրեց, որ սա արվում է այն բանի համար, որ մարդիկ իրենց երեխաների ծննդյան վկայականների թարգմանության ժամանակ խնդիրներ չունենան։ Նրա խոսքերով՝ արտասահմանում սեռի դաշտ ներառված է ծննդյան վկայականներում, իսկ թարգմանության դեպքում բարդություններ են լինում։
