Նախատեսվում է նորագույն և թանկարժեք տեխնոլոգիաներով բժշկական օգնության և սպասարկման իրավունք ունեցող շահառուների ցանկում ընդգրկել ևս մեկ խումբ` ավելացնելով առանց ծնողական խնամքի մնացած երեխաների թվին պատկանող 18-23 տարեկան անձանց, ինչպես նաև ընդլայնել ախտորոշված չարորակ նորագոյացություններով 15 և ավելի MeV (մեգաէլեկտրոնվոլտ) հզորություն ունեցող բժշկական գծային արագացուցիչով ճառագայթային բուժումից պետության կողմից երաշխավորված անվճար և արտոնյալ պայմաններով բժշկական օգնության և սպասարկման իրավունք ունեցողների շրջանակը` ավելացնելով բնակչության բոլոր խմբերը`արտոնյալ պայմաններով՝ համվճարային սկզբունքով, ի լրումն անվճար պայմաններով 15 և ավելի MeV (մեգաէլեկտրոնվոլտ) հզորություն ունեցող բժշկական գծային արագացուցիչով ճառագայթային բուժումից օտվելու իրավունք ունեցող թվով 15 սոցիալական խմբերի:
«Առողջության համապարփակ ապահովագրության մեր առաջարկած համակարգում գործելու է հիմնական ծառայությունների փաթեթ, որի մեջ ներառված ծառայությունները մինչև 18 տարեկան երեխաների համար ներկայացնում եմ ստորև (մեծահասակների ՀԾՓ-ն կներկայացնեմ առանձին գրառումով).
1. Արտահիվանդանոցային բժշկական օգնության և սպասարկման ծառայություններ, այդ թվում.
Տեղամասային բժշկի խորհրդատվությունը, իսկ անհրաժեշտության դեպքում վերջինիս ուղեգրմամբ նեղ մասնագետների խորհրդատվությունը և բժշկական ցուցումների հիման վրա ուղեգրում լաբորատոր-գործիքային ՝ այդ թվում հատուկ և դժվարամատչելի լաբորատոր-գործիքային ախտորոշիչ հետազոտությունների համար,
Հղիության հսկողության ընթացքում մասնագիտացված խորհրդատվությունը և պարտադիր լաբորատոր-գործիքային ախտորոշիչ հետազոտությունները,
Շտապ բժշկական օգնության ծառայություներ, այդ թվում սանավիացիա,
Ստոմատոլոգիական բժշկական օգնությունը,
Մտավոր և ֆիզիկական խնդիրներ ունեցող երեխաների խնամքի ծառայություններ,
Հիմնական դեղերի ցանկում ընդգրկված և տեղամասային բժշկի կողմից նշանակված դեղերի տրամադրում հիվանդությունների դեպքում,
2. Պետական հոգածության առողջապահական ծառայություններ, այդ թվում.
իմունիզացիա,
կանխարգելիչ բժշկական օգնություն, պարտադիր բժշկական զննումներ և լաբորատոր-գործիքային ախտորոշիչ հետազոտություններ,
աղիքային և այլ ինֆեկցիոն հիվանդությունների բժշկական օգնության ծառայություններ,
տուբերկուլյոզի բժշկական օգնության ծառայություններ,
ՄԻԱՎ/ՁԻԱՀ բժշկական օգնության ծառայություններ,հոգեկան և նարկոլոգիական հիվանդությունների բժշկական օգնության ծառայություններ, հեմոդիալիզի ծառայություններ:
3. Հիվանդանոցային բուժօգնության և սպասարկման ծառայություններ, այդ թվում.
Նորածինների վերակենդանացման և ինտենսիվ թերապիայի ծառայություններ,
Քրոնիկ հիվանդությունների սրացման դեպքում վերակենդանացման և անհետաձգելի բուժօգնության ծառայություններ,
Սիրտ-անոթային հիվանդությունների բուժում՝ այդ թվում սրտային վիրաբուժություն, առիթմոլոգիա, էնդովասկուլյար վիրաբուժություն,
Չարորակ նորագոյացությունների վիրահատության և ճառագայթային բուժման ծառայություններ, ինչպես նաև քիմիոթերապևտիկ բուժօգնություն,
Մանկաբարձություն և նեոնատալ խնամքի ծառայություններ,
Մանկական և նորածնային վիրաբուժության, ընդհանուր, անոթային, դիմածնոտային, էնդոկրին, կրծքային վիրաբուժության, ակնաբուժական, օրթոպեդիկ և վնասվածքաբանական, նյարդավիրաբուժական, միկրովիրաբուժական, գինեկոլոգիական, քիթ, կոկորդ, ականջաբանական և դիմածնոտային, ուրոլոգիական, պրոկտոլոգիական վիրահատություններ»,- ավելի վաղ նշել էր Արսեն Թորոսյանը:
Պայմանագրային գումարով բյուջեի չսահմանափակման սկզբունքը կկիրառվի ՀՀ պետական բյուջեի «Առողջապահություն» բաժնի «Զինծառայողներին, ինչպես նաև փրկարարական ծառայողներին և նրանց ընտանիքների անդամներին բժշկական օգնության ծառայություններ, «Մանկաբարձական բժշկական օգնության ծառայություններ» և «Սրտի անհետաձգելի վիրահատություններ» ծրագրերի վրա, իսկգումարները նախատեսված են բյուջեի ծախսի տնտեսագիտական դասակարգման «Նպաստներ» հոդվածով:
Պայմանագրային գումարով բյուջեի չսահմանափակման սկզբունքի կիրառման դեպքում առողջապահության նախարարության և կազմակերպությունների միջև կնքվող պայմանագրերում չեն ամրագրվի պայմանագրային գումարները:
Նախագծի հիմնավորման մեջ նշվում է, որ իրավական ակտի ընդունումը հնարավորություն կտա ապահովելու պետության կողմից երաշխավորված անվճար և արտոնյալ պայմաններով հիվանդանոցային օղակում իրականացվող բժշկական օգնության ու սպասարկման առավել հասանելիությունը, ստեղծել ճկուն մեխանիզմներ՝ դեպքերի ֆինանսավորումն իրականացնելու և չփոխհատուցվող դեպքերը բացառելու, հերթգրման մեխանիզմները կատարելագործելու ուղղությամբ:
Հաստատման դեպքում որոշումը ուժի մեջ կմտնի 2020 թվականի հունվարի 1-ից:
