Չեխիայի վարչապետ Անդրեյ Բաբիշը կարծում է, որ Առողջապահության համաշխարհային կազմակերպությունը (ԱՀԿ) պետք է լռի Չեխիայում կորոնավիրուսի տարածման հարցում: Համապատասխան հայտարարությունը քաղաքական գործիչը երեքշաբթի օրն արել է Twitter-ում՝ արձագանքելով կորոնավիրուսի դեմ կանխարգելիչ միջոցառումներն ուժեղացնելու ԱՀԿ-ի առաջարկությանը՝ ուղղված Չեխիայի իշխանություններին, հայտնում է ՏԱՍՍ-ը:
«Ես կարդում եմ այն, ինչի մասին խոսել է ԱՀԿ-ն, նույն ԱՀԿ-ն, որը խորհուրդ չէր տալիս օգտագործել բժշկական դիմակներ եւ չգիտեր, որ համավարակը սկսվել է: Իմ կարծիքով՝ նա պետք է լռի»,- ասել է Բաբիշը:
Չեխիայի ԱՀԿ մասնաճյուղը երեքշաբթի օրը ավելի վաղ անհանգստություն էր հայտնել երկրում կորոնավիրուսի հետ կապված իրավիճակի զարգացման կապակցությամբ: Կորոնավիրուսի վարակը, ինչպես նշել է կազմակերպությունը, տարածվում է հանրապետության ողջ տարածքում, վիրուսից առաջացած բարդություններով ծանր հիվանդների թիվն ավելանում է: Փորձագետները խորհուրդ են տվել, որ իշխանությունները ուժեղացնեն կանխարգելիչ միջոցառումները՝ ուղղված կորոնավիրուսի դեմ պայքարին, եւ ուժեղացնեն ազգային սանիտարահամաճարակային ծառայությունը:
Ըստ Բաբիշի՝ Չեխիայում կորոնավիրուսի տարածման հետ կապված իրավիճակը գտնվում է իշխանությունների վերահսկողության տակ, որոնք ԱՀԿ առաջարկությունների կարիքը չունեն: Վարչապետը նշել է, որ կորոնավիրուսից մահվան դեպքերի քանակով հանրապետությունը 26-րդ տեղն է զբաղեցնում Կենտրոնական եւ Արեւմտյան Եվրոպայի 31 երկրների շարքում: