ԱՄՆ նախագահ Դոնալդ Թրամփի վարչակազմը նահանգների իշխանություններին կոչ է արել արագացնել կորոնավիրուսի դեմ պատվաստանյութերի բաշխման կենտրոնների հայտերի ներկայացումը, հայտնում է The Wall Street Journal-ը։
Հիվանդությունների վերահսկման և կանխարգելման կենտրոնի տնօրեն Ռոբերտ Ռեդֆիլդն ԱՄՆ նահանգային իշխանություններին «հրատապ» նամակ է հղել՝ խնդրելով օժանդակություն ցուցաբերել կորոնավիրուսի դեմ պատվաստանյութերի բաշխման կենտրոնների հայտերի ներկայացման գործընթացն արագացնելու համար: Այդ կենտրոնները պետք է լիովին գործեն մինչև 2020 թվականի նոյեմբերի 1-ը:
«Դաշնային կառավարությունը Covid-19-ի դեմ պատվաստանյութի գրանցված մատակարարներից պատվաստանյութը և օժանդակ նյութերը գնելու է և անվճար բաշխելու»,-ասված է փաստաթղթում։
Նշվում է, որ McKesson Corp. ամերիկյան ընկերությունը գործարք է կնքել դաշնային կառավարության հետ և պատվաստանյութի հասանելի լինելու դեպքում կստանա բաշխման կենտրոնների ստեղծման թույլտվություն։
Այս ժամանակացույցը մտահոգություն է առաջացրել հանրային առողջապահության փորձագետների շրջանում, որոնց կարծիքով՝ նախագահական ընտրությունների նախաշեմին «հոկտեմբերյան անակնկալը»` կորոնավիրուսի դեմ պատվաստանյութին հավանություն տալն ու դրա բաշխումը, պայմանավորված է քաղաքական նկատառումներով և ոչ թե գիտությամբ։
