Վորլդ Վիժն Հայաստանն իրականացրել է համավարակի ազդեցության գնահատում՝ նպատակ ունենալով բացահայտել այն հիմնական խնդիրները, որոնք համավարակի հետևանքով առաջացել են կազմակերպության ծրագրերում ներառված ծայրահեղ աղքատ և խոցելի ընտանիքների շրջանում։
Հարցումն իրականացվել է 1175 ընտանիքների շրջանում։ Ուսումնասիրվել է համավարակի ազդեցությունը կրթության կազմակերպման, եկամուտների (ապրուստի միջոցների) և ներընտանեկան հարաբերությունների համատեքստում։
Կրթության կազմակերպման վերաբերյալ հարցումները ցույց են տվել, որ հարցվածների 80․9%-ի մոտ առկա է թվային տեխնիկական սարքավորում։ Այնուամենայնիվ, հարցված ընտանիքների երեխաների 13.8%-ը, այդ թվում՝ հաշմանդամություն ունեցող երեխաների 28.6%-ը, չի մասնակցել հեռավար դասերին՝ մեծամասամբ անհրաժեշտ տեխնիկական սարքերի բացակայության և ինտերնետ կապով ապահովված չլինելու պատճառով։
Մտահոգիչ են հատկապես ընտանիքների եկամուտներին և տնտեսական վիճակին վերաբերող տվյալները։ Մասնավորապես՝
- Հարցվածների 44.6%-ի տնտեսական վիճակը տուժել է COVID-19 բռնկումից հետո:
- 7%-ի աշխատանքը տուժել է COVID-19 բռնկումից հետո:
- Նախքան CՕVID-19-ը, օրավարձով աշխատանքից եկամուտ էր ստանում ամեն 4-րդը ընտանիքը, իսկ COVID-19-ի հետևանքով՝ ամեն 10-րդը։
- Նախքան COVID-19-ը, արտագնա աշխատանքից եկամուտ էր ստանում ամեն 4-րդը ընտանիքը, COVID-19-ի հետևանքով` ամեն 20-րդը։
- Նախքան համավարակը, 100 ընտանիքից 13-ը օգնություն էր ստանում բարեգործական կազմակերպություններից։ Հարցման պահին ստանում էր 100-ից 24-ը։
«Այս հետազոտությունը մեզ թույլ է տալիս լավագույնս պատկերացնել կազմակերպության ծրագրերում ընդգրկված ծայրահեղ աղքատ ընտանիքների կարիքները և մեր հետագա անելիքները մշակել համապատասխան այս կարիքներին։ Այս ընտանքիների հետ աշխատանքում Վորլդ Վիժնը, բացի անմիջական աջակցության տրամադրումից, իրականացնելու է նաև «Աղքատության փուլային հաղթահարման» ծրագիրը, որպեսզի համապարփակ միջամտությունների արդյունքում հնարավոր լինի ընտանիքներին դուրս բերել ծայրահեղ աղքատությունից», — նշում է Վորլդ Վիժն Հայաստանի «Ընտանիքների աղքատության հաղթահարում» ծրագրի ղեկավար Վահե Դարբինյանը։
Հետազոտությանը մասնակցած ընտանիքները մասամբ են կարողանում կամ ընդհանրապես չեն կարողանում հոգալ հիմնական կարիքները․
- 8%-ը՝ սննդի,
- 7%-ը՝ ախտահանիչ նյութերի, դիմակների և ձեռնոցների,
- 6%-ը՝ մաքրող ու լվացող միջոցների,
- 7%-ը՝ երեխաների հեռավար դասընթացի համար անհրաժեշտ համակարգիչների ու բջջային հեռախոսների,
- Իսկ 70.7%-ը՝ դպրոցական պարագաների կարիքը (գրիչ, ներկ, տետր, քանոն, թուղթ և այլն):
Մարտ ամսից ի վեր Վորլդ Վիժն Հայաստանն աջակցել է ավելի քան 4,000 ընտանիքի Հայաստանի 6 մարզերում և մայրաքաղաք Երևանում։ Վորլդ Վիժն Հայաստանը նաև տրամադրել է սարքավորումներ և ինտերնետ կապի հնարավորություն ծայրահեղ աղքատ ընտանիքներին։
«Թեպետ ծայրահեղ աղքատ ընտանիքներին աջակցություն տրամադրվել է թե՛ Վորլդ Վիժն Հայաստանի, թե՛ պետական և այլ հասարակական կառույցների կողմից, այնուամենայնիվ, այս աջակցությունը ոչ միշտ է եղել համակարգված։ Օրինակ` որոշ համայնքներում համակարգման բացակայությունը հանգեցրել է նրան, որ միևնույն ընտանիքները կրկնակի աջակցություն են ստացել, մինչդեռ մյուսները չեն ստացել որևէ աջակցություն՝ ակնհայտորեն ունենալով դրա կարիքը», — ասում է որլդ Վիժն Հայաստանի Շահերի պաշտպանության և համագործակցության հարցերով փորձագետ Գայանե Մարտիրոսյանը։
Հետազոտության ամբողջական տարբերակները՝ հայերեն լեզվով և անգլերեն լեզվով։
Հետազոտության վերաբերյալ ինֆոգրաֆիկ տեսանյութը։