Հարաբերությունների գրագետ սկիզբը հետագա զարգացման հիմնաքարն է, ուստի շատ կարևոր է, հատկապես, սիրային հարաբերություններ սկսելիս լինել առավել ուշադիր: MedMedia.am-ի առաջարկով հոգեբան Ռաֆայել Պետրոսյանն առանձնացրել է մի քանի կետ առողջ հարաբերությունների սկզբի և պահպանման համար: «Առաջարկում եմ չորս կանոն սիրային հարաբերություններ սկսելու համար: Այսպիսով. մի՛ սկսեք նոր հարաբերություններ անմիջապես հին ավարտելուց հետո, ձեզ ժամանակ տվեք, ներե՛ք նախկին զուգընկերոջը, հստա՛կ որոշեք՝ ինչ եք ուզում հարաբերություններում, ինչ՝ ոչ և 6-12 ամիս ուսումնասիրեք ձեր նոր զուգընկերոջը»,-ասաց հոգեբանն ու հաջորդիվ ներկայացրեց հարաբերությունների համար չանհանգստանալու 7 պատճառ՝
- Ընդհանուր առմամբ դուք երջանիկ եք, ժամանակի մեծ մասը դուք ձեզ սիրելի եք զգում և սիրում եք,
- Ձեր վեճերը չեն ավարտում հարաբերությունների խզման սպառնալիքներով և լռության երկարատև դրվագներով,
- Դուք կարող եք կիսվել ձեր զուգընկերոջ հետ ձեր ցանկությունների, սխալների, տխրության, կասկածների մասին, նա միշտ չէ, որ կիսում է դրանք, սակայն հարգում է և աջակցում է ձեզ,
- Դուք լավ ժամանակ եք անցկացնում ինչպես միասին, այնպես էլ իրարից առանձին,
- Դուք չունեք այն զգացողությունը, թե «պայքարում եք» այդ հարաբերությունների համար,
- Դուք ունեք միասնական նպատակներ և պլաններ:
Միաժամանակ, Ռաֆայել Պետրոսյանը հարաբերություններում առանջնացրեց ևս 7 պատճառ անհանգստանալու համար՝
- Զուգընկերը ձեզ նվաստացնում է և ճնշում է ֆիզիկապես ու հոգեպես,
- Դուք ապրում եք «իմ երջանկությունը քո ձեռքերում է» սկզբունքով,
- Դուք չեք պատկերացնում ձեր կյանքը առանց երեխաների/ առանց ընդհանուր հանգստի/ առանց սեռական կյանքի/ և այլն, իսկ ձեր զուգընկերը չի կիսում ձեր տեսակետը,
- Հարաբերություններում դուք տալիս եք ավելի շատ, քան ստանում եք,
- Դուք ցանկանում եք բաժանվել, սակայն չեք անում դա ինչ-որ պատճառով /ընդհանուր երեխաներ, միայնակ մնալու վախ, հիպոտեք, մեղավորության զգացում, կախվածություն, խղճարահարություն զուգընկերոջ հանդեպ և այլն/,
- Զուգընկերը սպառնալիքի ուժով ստիպում է ձեզ մնալ իր կողքին
- Տարիներ շարունակ դու փորձում եք ապարդյուն փոխել ձեր զուգընկերոջը և չեք դադարում դա անել:
