Այսօր՝ օգոստոսի՝ 13-ին, կառավարության դիմաց բողոքի ակցիա էին իրականացնում Եկմալյան փողոցի բնակիչները։ Ակցիայի ընթացքում մի տիկնոջ ինքնազգացողությունը վատթարացավ, ժամանեց շտապօգնության մեքենան և նրան տեղափոխեցին։
Կինը, ինչպես ներկայացրին Եկմալյանի բնակիչները, երկար ժամանակ է, ինչ իրենց խնամքի տակ է։ Բնակիչներից մեկը հայտնեց․«Տիկին Բաթոյանը պարտավոր է հատկացնել Շուշանիկ Վարդանյանի դեղերը։ Մի տարի է՝ դեղեր է գրված, դեղերը չի հատկացնում 1-ին կարգի հաշմանդամին։ Մի քանի անգամ ինսուլտ է խփել, դեղեր են անհրաժեշտ»։
Բնակիչների հայտնածը փորձեցինք ճշտել Աշխատանքի և սոցիալական հարցերի նախարարության մամուլի խոսնակ Սոնա Մարտիրոսյանից։
«Եթե որևէ մեկն ունի հաշմանդամություն, ապա իր հաշմանդամության խմբում և վերականգնողական անհատական ծրագրի մեջ շատ հստակ գրված է, թե որ առողջապահական ծրագրերից կարող է օգտվել անվճար, ինչ դեղեր կարող է անվճար ստանալ, որոնք կարող է ստանալ արտոնյալ պայմաններում և որոնք չեն մտնում իր բուժման հիմնական ցուցումների մեջ»,-տեղեկացրեց Մարտիրոսյանը։
Նրա խոսքով՝ մեր նշած մասնավոր դեպքին ծանոթ չէ․«Այնուամենայնիվ, եթե խնդիրը առողջապահական է, մենք առողջապահական ծառայությունների մատուցման մասով որևէ իրավասություն չունենք։ Մեր իրավասությունը քաղաքացուն բժշկա-սոցիալական փորձաքննության ենթարկելն է և, ըստ այդմ՝ համապատասխան հաշմանդամության կարգը սահմանելը։ Եթե քաղաքացին ունի հաշմանդամության կարգ, ապա նա կարող է օգտվել իր անհատական-վերականգնողական ծրագրով, իր համար սահմանված բոլոր տեսակի ծառայություներից և դեղորայքից։ Այսինքն՝ այստեղ դեղերը չտալու խնդիր ուղղակի չի կարող լինել»։
Նա նշեց, որ այդ ամենը կատարվում ըստ պատշաճի։
