Ամերիկահայ հայտնի գործարար Նուբար Աֆեյանի Moderna ընկերությունը հայտնել է իր կողմից մշակվող կորոնավիրուսի պատվաստանյութի գինը, որը եղածների մեջ առայժմ ամենաբարձրն է:
Ըստ ընկերության՝ փոքրածավալ գործարքների դեպքում պատվաստանյութի յուրաքանչյուր չափաբաժինը կարժենա 32-37 ԱՄՆ դոլար: Այս մասին հայտնում է Reuters լրատվական գործակալությունը:
Դա գրեթե 2 անգամ ավելի է, քան Pfizer և BioNTech ընկերություններն առաջարկել են ԱՄՆ-ին իրենց կողմից մշակվող պատվաստանյութի 100 մլն դեղաչափի համար: Johnson&Johnson ընկերությունը ԱՄՆ-ի կառավարությունից յուրաքանչյուր դեղարափի համար պահանջել է 10 ԱՄՆ դոլար: AstraZeneca ընկերությունը ԱՄՆ-ի կառավարության հետ 1.2 մլրդ դոլարի գործարք է կնքել՝ պատվաստանյութի 300 մլն դեղաչափի մատակարարման համար:
Moderna-ի գործադիր տնօրեն Ստեֆան Բանսելը հայտնել է, որ մեծածախ գործարքների դեպքում գինն անհամեմատ ավելի ցածր կլինի, իսկ մանրածախ գործարքներ ասելով՝ Բանսելը նկատի է ունեցել մինչև 10 մլն դեղաչափի վաճառքը:
Moderna-ն կորոնավիրուսի դեմ պատվաստանյութ ստեղծող ընկերությունների շարքում առաջատարներից մեկն է: Ընկերությունն արդեն սկսել է կլինիկական փորձարկումների երրորդ փուլը՝ 30 հազար մարդու մասնակցությամբ:
