Ծխախոտի գործածությունը խիստ բացասաբար է անդրադառնում ամբողջ օրգանիզմի վրա և բարձրացնում է մի շարք վտանգավոր հիվանդությունների զարգացման հավանականությունը, ուստի զարմանալի չէ, որ մասնագետները հորդորում են օր առաջ հրաժարվել այս վտանգավոր սովորությունից:
Ծխելը թողնելը կօգնի աստիճանաբար մաքրել թոքերն ու օրգանիզմը ծխախոտի հետևանքով կուտակված վնասակար տարրերից ու պաշտպանվել վտանգավոր հետևանքներից: Միևնույն ժամանակ կան նաև մի շարք արդյունավետ միջոցներ, որոնք ձեռնարկելը կօգնի արագացնել թոքերի մաքրման գործընթացը: Ձեր ուշադրությանն ենք ներկայացնում դրանցից մի քանիսը:
Օգտագործել լոռամիրգ
Այս հատապտղի գործածությունը նպաստում է թոքերում գտնվող և ծխախոտի ծխով խցանված թարթիչների ակտիվ մաքրմանը, իսկ սա շատ կարևոր է, քանի որ հենց այս թարթիչներն են պաշտպանում օրգանիզմն օդում առկա քաղցկեղածին տարրերից: Թարթիչները մաքրելու և դրանց ակտիվ աշխատանքը վերականգնելու համար հարկավոր է օրական մի բուռ լոռամիրգ ուտել:
Կոճապղպեղով թեյ խմել
Ծխող մարդկանց թոքերը նիկոտինի երկարատև ազդեցության հետևանքով ավելի խոցելի են դառնում բորբոքային գործընթացների նկատմամբ, իսկ կոճապղպեղն օժտված է հակաբորբոքային ազդեցությամբ, ինչի շնորհիվ օգնում է պաշտպանել թոքերը նման խնդիրներից:
Հետևել առողջ սննդակարգին
Ծխելը թողնելուց հետո մարդը պետք է վերանայի իր սննդակարգը, դարձնի այն ավելի բազմազան և ներառի հնարավորինս շատ թարմ մթերք, բանջարեղեն ու մրգեր: Օգտակար միկրոտարրերով հարուստ մթերքը ոչ միայն կօգնի ամրապնդել օրգանիզմն ու իմունային համակարգը, այլև կնպաստի վնասակար տարրերի դուրսբերմանը:
Հաճախ զբոսնել մաքուր օդին
Երկարատև զբոսանքները թոքերի մաքրման ու վերականգնման լավագույն միջոցն են, ուստի հարկ է հիշել հաճախ մաքուր օդին զբոսնելու անհրաժեշտության մասին:
Խուսափել պասիվ ծխելուց
Ծխախոտից հրաժարված պասիվ ծխողները հաճախ են կորցնում կամքի ուժը և կրկին սկսում են ծխել: Բացի այդ, ծխախոտի ծուխն ախտահարում է դեռ թուլացած թոքերը քաղցկեղածին նյութերի նոր չափաբաժնով, ինչը կարող է շատ վնասակար լինել:
Նյութի աղբյուրը՝ medikforum.ru
