Վիժումը մինչև 20 շաբաթական հղիության ինքնաբուխ (ոչ արհեստական) ընդհատումն է:
Վիժումը սովորաբար տեղի է ունենում ձեր հսկողությունից դուրս գտնվող գործոնների պատճառով և, որպես կանոն, չի կարող կանխարգելվել:
Վիժումը չպետք է շփոթել հղիության արհեստական ընդհատման՝ աբորտի հետ: Տարբերությունն ավելի հստակեցնելու համար որոշ բժիշկներ ավելի հաճախ օգտվում են «ինքնաբուխ վիժում», «ինքնաբեր վիժում» («սպոնտան վիժում») անվանումներից: Վիժումը նաև տարբերվում է մեռելածնությունից, որը տեղի է ունենում 20 շաբաթականից բարձր հղիության ժամանակ:
Վիժում ապրած կանանց մեծ մասը սովորաբար իր հաջորդ հղիության նկատմամբ ավելի ուշադիր է լինում:
Պատճառներ
Վիժումը գլխավորապես զարգանում է ձեր կամքից անկախ և ոչ ձեր մեղքով: Որևէ փաստ չկա այն մասին, որ հղի կնոջ կողմից ֆիզիկական վարժանքներ կատարելը, սթրեսի ենթարկվելը, քայլքը կամ սեռական հարաբերություն ունենալը կարող են վիժումով ավարտվել: Բազմաթիվ ծնողներ այդպես էլ չեն կարողանում հասկանալ, թե կոնկրետ ի՞նչն է եղել հղի կնոջ մոտ վիժման պատճառը:
Իրականում, վիժումը պայմանավորված է քրոմոսոմային շեղումներով, ինչն արգելակում է պտղի զարգացումը: Ըստ որում, քրոմոսոմային այս շեղումները չեն ժառանգվում:
Հազվադեպ վիժումը կարող է ունենալ հետևյալ պատճառները՝
- հորմոնալ շեղումներ
- իմունային համակարգի խանգարումներ
- արյան մակարդելիության խանգարումներ
- որոշ հիվանդություններ (օրինակ՝ վահանաձև գեղձի հիվանդություններ կամ դիաբետ)
- մարմնի բարձր ջերմությամբ (տենդ) ուղեկցվող վարակիչ հիվանդություններ
- արգանդի կամ արգանդի պարանոցի անատոմիական խնդիրներ:
Ռիսկի գործոններ
Վիժելու հավանականությունը մեծանում է հետևյալ դեպքերում՝
- կնոջ մեծ տարիք
- ծխախոտի օգտագործում
- ալկոհոլային խմիչքների օգտագործում, հատկապես հղիության առաջին եռամսյակում
- կոֆեինի մեծ քանակների օգտագործում (սուրճ և կոֆեին պարունակող այլ ըմպելիքներ)
- նախկինում վիժումների առկայություն:
Վիժման տեսակները
Ըստ ընթացքի, տարբերում են վիժումների մի քանի տեսակներ, որոնք են՝
- սպառնացող վիժում՝ երբ առկա է հեշտոցային արյունահոսություն և կծկողական ցավեր, սակայն արգանդի վզիկը դեռ փակ է
- անխուսափելի («ընթացքի մեջ») վիժում՝ երբ վերոնշյալին ավելանում են արգանդի վզիկի լայնացումը և/կամ պտղապարկի պատռվածքը
- ամբողջական վիժում, երբ պտուղը լրիվ վիժվում է
- չկայացած վիժում՝ երբ մահացած պտուղը մնում է արգանդում և չի վիժվում
- կրկնվող վիժում՝ երբ մեկ հղիության սահմաններում կինը 3 կամ ավելի անգամ վիժում է:
Վիժման նշանները
Վիժումը հաճախ ուղեկցվում է հետևյալ նշաններով՝
- որովայնի շրջանի կծկանքային (սպաստիկ) ցավեր, որոնք նմանվում են դաշտանային ցավերին (սակայն կարող են լինել ավելի ուժեղ)
- գոտկամասում տեղակայված ձգող ցավեր
- հեշտոցային արյունահոսություն:
Վիժման կանխագելումը
Ցավոք, վիժումը հստակ կանխարգելող որևէ միջոց գոյություն չունի:
Այնուամենայնիվ, արժե խորհել վիժման հավանականությունը բարձացնող ռիսկի գործոնները վերացնելու կամ նվազեցնելու մասին (ձերբազատվել ծխախոտից, հղիության ընթացքում զերծ մնալ ալկոհոլային խմիչքներից, կոֆեին պարունակող սննդատեսակներից և այլն):
Ապագա հղիությունները
Վիժում ունեցած կանանց մեծ մասը հետագայում հաջող հղիություն են անցկացնում: Այնուամենայնիվ, նախկինում վիժում ունենալը բարձրացնում է ապագա վիժումների հավանականությունը (ռիսկը դառնում է 20% կամ հինգից մեկը):
Եթե նախկինում ունեցել եք երեք և ավելի մեծ թվով վիժումներ, ձեր բժիշկը հավանաբար կնշանակի գենետիկ որոշ հետազոտություններ:
