Կանադայի վարչապետ Ջասթին Տրյուդոն հայտարարել է, որ իրենք մի շարք դաշնակիցներից՝ այդ թվում և հարևան ԱՄՆ-ից, շատ ավելի լավ են պայքարել կորոնավիրուսի համավարակի դեմ, հայտնում է The Guardian պարերականը։
Աղբյուրը մանրամասնում է, որ Կանադայից մոտ տաս անգամ ավել բնակչություն ունեցող ԱՄՆ-ում կորոնավիրուսի վարակակիրների թիվը գերազանցել է 3 միլիոնը, մահացել է ավելի քան 131 000 մարդ։ Երկրի իշխանությունները հայտնել են, որ ԱՄՆ տասնյակ նահանգներում վարակակիրների թիվը շարունակում է մեծ տեմպերով ավելանալ։
Մինչդեռ Կանադայում համավարակի սկզբից ընդհանուր գրանցվել է 106 167 դեպք, որից 8711-ը՝ մահվան ելքով: Նշվում է, որ երկրում համաճարակային իրավիճակը գնալով կայունանում է։
«Մենք կարողացել ենք մեր ցանկացած դաշնակցից, այդ թվում և մեր հարևանից շատ ավելի լավ վերահսկել վարակի տարածումը»,- նշել է Տրյուդոն։
Կանադան և ԱՄՆ-ն մարտից սկսած մասամբ արգելել են երկու պետությունների քաղաքացիների մուտքը և այժմ քննարկվում է հուլիսի 21-ին արգելքի ժամկետի լրանալուց հետո այն չեղարկելու կամ երկարաձգելու հարցը։
Հայտնի է, որ այս շաբաթ անցկացված սոցհարցման տվյալներով՝ կանադացիների 80 տոկոսը դեմ է սահմանների վերաբացմանը։