Բրազիլիայի նախագահ Ժաիր Բոլսոնարուն, որ կորոնավիրուսով է վարակվել, պատմել է, որ բուժվելու համար հիդրոքսիքլորոխին (hydroxychloroquine) կոչվող դեղամիջոցն (օգտագործվում է ռևմատոիդ արթրիտի և մալարիայի դեմ) է ընդունում: Նախագահն ընդգծել է, որ դեղամիջոցի ընդունումից հետո իրեն «ավելի լավ է» զգում, գրում է Daily Mail-ը։
Կորոնավիրուսի թեստի դրական պատասխանի մասին հրապարակավ հայտնելուց ժամեր անց Բոլսոնարուն հրապարակել է տեսանյութ, որում ընդունում է բազմիցս ԱՄՆ նախագահ Դոնալդ Թրամփի գովասանքին արժանացած հիդրոքսիքլորոխինը:
Բոլսոնարուն տեսանյութում պնդում է, որ այն ընդունելուց հետո իրեն «ավելի լավ է զգում»։
«Այսօր ինձ ավելի լավ եմ զգում, այնպես որ այն (հիդրոքսիքլորոխին) արդյունք է տալիս։ Այսօր մենք գիտենք, որ կան նաև այլ միջոցներ, որոնք կարող են օգնել պայքարել կորոնավիրուսի դեմ»,- ասել է 65-ամյա Բոլսոնարուն։
«Մենք գիտենք, որ դրանցից ոչ մեկը գիտական տեսանկյունից չի ապացուցել իր արդյունավետությունը, բայց ես համալրեցի այն մարդկանց շարքը, որոնց այս դեղամիջոցն օգնում է։ Այնպես որ, ես վստահում եմ հիդրոքսիքլորոխին, իսկ դո՞ւք»,- տեսանյութում ասում է Բրազիլիայի նախագահը:
Այնուամենայնիվ, հետազոտողները դեռևս չեն ապացուցել կորոնավիրուսի բուժման հարցում այս դեղամիջոցի արդյունավետությունը։
Հիշեցնենք, որ երեկ Բրազիլիայի նախագահ Ժաիր Բոլսոնարուն հայտարարել էր, որ կորոնավիրուսի թեստը դրական պատասխան է տվել: 65-ամյա քաղաքական գործիչը բազմիցս ակտիվորեն քննադատել է կորոնավիրուսի ֆոնին հայտարարված սահմանափակումները՝ վարակն անվանելով՝ «թեթև գրիպ»։ ԱՄՆ նախագահ Դոնալդ Թրամփի հետ գաղափարների նմանության պատճառով նրան հաճախ անվանում են «արևադարձային Թրամփ»։